一字記之曰，等 老美過完個超級星期二，希拉莉4比0，基乎肯定出線；特朗普扭轉之前弱勢打個5比0，重差300票左右就可以出線；暫時得出結論係美國佬十分緬懷當日克林頓的經濟成果同布殊的大美國鷹派主義，耶阿姨又開會議息，全世界都佢估唔加，意外驚喜應該就唔會有，但係呢次個聲明放鷹機會大，年尾要大選，加息機會唔大，淨翻最大機會係6月，咁樣有無可能加息幅度會出手重D，拭目以待。歐洲央行乜招都用過，經濟重係無起色，都係要等美國加息先救到佢。阿爺債市無運行，據媒體同官方指標推算，債市現時槓桿資金超過5萬億，由於去年高槓桿資金直接引起股災，債市去槓桿又將成為下一個面對收緊的市場；首先債市係經濟體系流動性的源頭，總量係股市的十多二十倍，只要再有債務違約(據海通證券資料顯示較高風險債券接近500隻，總額接近7000億)，質押率受影響而下降或甚至乎不被接受，新一輪斬倉潮出現，將會造成無法估計的後果(希臘就係典型例子)。國債最近走弱，明顯係受上述因素加上央媽從某些管道收緊銀根引起；因為第一季D數據都唔差，再放水肯定扯高CPI，到時候滯脹都有可能；唔放水咩，股市同樓市即時中槍，最有可能係房價大幅下跌(股市咁低，要跌都無幾多)，銀行呆壞帳增加，系統性風險可能出現，央媽而家正式豬八戒照鏡，兩面不是人，我地又睇佢呢次點解圍。香港魚缸臨近結算，應該呢個禮拜都係牛牛皮皮，唯一要注意係大戶五月期權未開倉，呢種情況比較少有，睇落大戶都係等緊消息。 今次焦點神州租車699，睇個名就知佢主營業務係租車，其他邊際業務就有二手車，汽車租賃同道路救援呢D；13年底更開始容許加盟商在集團未有直營店的小城市經營。業務雖然好似成條產業鏈都打通左，但就非常單一，但月初集團的神州優車申請掛牌新三板就不能睇少。從經營數據顯示，神州租車從12到15呢四年的毛利由4.9億急增至21億，證明市場定位正確(因為同期跑贏滴滴，Uber同易到呢D對手)；但係賺唔賺錢除左睇營業收入同毛利率外，重有一樣就係控制成本，一般租車公司主要支出不外乎控制折舊率(包括壓低買入價，處理二手車能力同延長車輛服務期)，集團呢方面表現就非常突出，從12年的34%單邊遞減到15年的21%，中間無反彈過；由於車輛服役期一般係36個月，所以退役車處理能力亦直接影響收入，集團在二手車處理方面亦表現理想，由14年平均單價每部6.4萬元到15年平均單價每部6.5萬元；神州租車亦將直接運營成本（包括工資、門店、保險、維修、燃料）壓縮到31%相對較低的佔比。至於市場環境方面，神州租車有別於其他對手的C2C模式，集團走B2C路線，在相對固定的成本下(固定的工資，固定的車輛成本)，只有汽油才是浮動成本，好處就係量越大，成本越低。另外江湖傳聞 “網絡預約出租汽車經營服務管理暫行辦法” 將在5月出臺，內容具體提出對私家車做網約車實施限制，例如規定報廢車齡在8年或甚至更短，咁樣好多私家車車主就可能退出網約車行列，直接對其他對手(滴滴，Uber，易到)造成嚴重打擊。月初集團旗下神州租車母公司神州優車申請新三板上市，資料顯示開張一年蝕左37億，但係估值就300億，陸主席話今年第三季度會實現盈利，好多人可能話佢吹水，我覺得唔係無可能；首先係集團之前大手筆做推廣，客戶充值幾多就送幾多(重要唔封頂，你充1萬我就送1萬，變相半價)，如果回復原價，收入方面可以增加大約18億(由於B2C原因，客戶流失唔會好多)；網約車管理法出臺會壓縮對手的競爭力同市場佔有率(車輛數目減少造成約唔到車，客戶自然俾貴D搵神州)；國內陸續會有城市加入汽車限購，交通法亦越來越嚴，好多人唔買車就會考慮用專車(同一般網約車唔同就係專車比較高檔次，最低級都用到Camry或同級車，特別係小企業生意佬)。綜合各樣條件，保守預計神州專車今年全年業績可以做到小虧甚至持平，加上新三板掛牌成功(總理話過鼓勵創新同發展第三產業，估計申請掛牌應該唔會被拒絕)，假設市盈率不變(而家市盈率13倍唔到)，神州租車合理股價可以到11元樓上，加上神州優車的市值注入，一年目標價17元，現價可以開始吸納。 下星期輪到隻粵運交通3399

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 鬆完又緊，睇見頭暈 香港個市呢頭係咁升， D財經演員話好快見22000，星期三就一招高台跳水加細V彈，成街都係眼鏡，之前幾個禮拜大戶做落D期權空倉一直無平，港股短線唔睇好，長線會因為美元轉強而受惠。老美6月加息好似已成定局，但每次數據只要好一段時間，即時就有D唔靚數據出，真係覺得連老美都開始玩手段，以後數據唔好信十足。再提醒一下6月S&P期權2000點淡倉未走，小心小心。祖國第一季GDP6.7%，屬於官方可接受範圍內，假如房價唔係升左咁多，有無6.5%都成問題；3月CPI有2.3%，睇落唔差，不過阿爺目標係3%，市場一般理解係會進一步放水，加上今年係將食品在CPI比重由32%跌到20%，人為因素拖低指標，造就減息降準空間，一個放水預期搞到散戶齊齊落水，出錢又出力去頂個市上去；可惜好景不常，新華社同央行有關人士先後表示貨幣政策要回歸穩健，理由係房地產價格急升同通脹因素，表面上非常合理，但諗深一層，收水後D樓價會點走，企業今時今日面對錢荒又頂唔頂得住，要把握好呎吋唔係易事；最近要留意阿爺10年期國債期貨開始有人拋售，係唔係有人預先猜到要收水定係巧合，相信好快會水落石出，但係星期三個市就應聲倒地，如果正式收水，散戶又一次跣低。 今次焦點2319蒙牛乳業，業務單一簡單，就係賣奶同乳製品。睇翻15年份成績表，結論一個曳字講晒；粗略睇銷售額，奶粉跌7億幾，雪糕跌5億幾(呢兩瓣打個八折)，D奶賣多3億唔夠，埋數都唔見差唔多10億；阿媽已經頭暈身慶，點知個仔(雅士利)又唔生性，銷售額下滑6億，連累整體成績差強人意。根據市場數據，大陸奶粉市場佔全球銷售額一半，唔好搞錯以為係人多，其實係同胞對國內D奶源唔放心，幾歲大細路都重飲緊奶粉(美國一兩歲就開始餵全脂奶)，有乜辦法奶粉唔好賣；大陸食品安全問題一日唔搞掂，呢種畸形現象係唔會好轉。點解奶粉賣咁貴但係又唔安全？主要係奶源分散，在物流，保存和管理上都容易出問題，所以投資奶業相關股票要好小心，因為大把黑天鵝，並唔係單一風險咁簡單。由於原奶價格已勁好長時間維持在低位，搞到現代牧業呢D奶源企業都開始加入成品奶行業，直接加劇市場競爭，各個企業都加大促銷力度，造成蒙牛在傳統產品範圍的競爭力同市場份額不斷下降。基於原奶價格已經大跌，蒙牛透過大量促銷活動力求保住半壁江山，但最終結果毛利率先微升0.8%，對比一下伊利，人地前三季度毛利率就升左2.3%，證明一個如日中天，一個夕陽遲暮。預期2016年業務好可能零增長甚至負增長，現價先沽貨離場，一年目標價8.5(大約有35%下跌空間) 下星期輪到隻神州租車699

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 失驚無神，挾到失魂 阿爺忽然發惡，3月出口神奇地按年升18.7%，遠好過預期，進口連續17個月縮水，但降幅收窄，出口按季跌4.2%(睇落唔係咁差喎)，家陣市面經濟風聲鶴唳，季結搞呢科，大家心照啦。兩大裁判呢頭調低完阿爺評級，IMF突然又話中國經濟唔係想像咁差(歐洲環境唔好兼歐元高企，最理想緊係熱錢流去阿爺度，歐洲自然有著數)，散戶信邊個，信裁判咩，呢次一舖清袋；信IMF重慘，之前輸到嘔。呢兩日好消息一浪接一浪，在此奉勸大家保持清醒，點解？唔好忘記天津銀行7.86億票據事件；中晉事件(透過國太控股控股三間上市公司，香港重有好多上市公司都有國內協力廠商理財公司同私募基金做股東，萬一出事又係一個炸彈)；浙江省交通投資集團旗下溫州海運同台州海運出現債務違約(船舶融資租賃貸款共3662萬)，月尾重有441萬融資租賃貸款同1600萬銀行貸款；中鐵物資168億債券暫停交易(央企都搞成咁，民企咪重難捱!)，國內債券市場從年頭到而家已經有9單債務實質性違約出現，其中東北特鋼在3月27日有45億債務到期兌付唔到本息，為國企違約開左第一槍；另外網上傳聞標普下調恒大地產評給至B-(新聞一出唔到幾個鐘就刪左，但恒大又唔澄清，新聞唔見香港有出街，真定假無人知，留心發展，時刻警惕，萬一傳聞屬實，資金鏈可能出現問題)；計埋p2p走路都唔知幾多億，對成個金融系統衝擊有幾大就等睇好戲。最後一提就係禮拜三個市挾得咁狠，臨近阿爺期指結算同政策性導向有關(再唔衝上去分分鐘齊齊散水，到時托都托唔住)，會唔會結算完就翻面唔識人，禮拜一就知道。重有兩個月就到MSCI指數市場諮詢，舊年阿爺入唔到門，今年表明除原有考慮條件外，加入大規模主動停牌同反競爭條款兩項，睇怕阿爺今年好可能又嫁唔成(按自由流通市值計，好多內銀都榜上有名，萬一股價波幅太大搞到個指數都跳水，大家都唔想)。老美就無乜特別，雖然三月會議記錄表明意見分歧，但要注意係四月好似越來越有條件加息，無論外圍環境，國內就業同通漲指標都突然好轉(其實三月份數據不至於唔支持加息，只係怕市場唔接受)，睇怕都好難有理由話唔加啦。歐洲加大量寬，剛好幫耶倫阿姨接火棒，再唔加息美元就繼續走軟，扯低個債價就大吉利是，到時候邊個肯高位接老美個盤？香港個市就先沽貨離場，睇定先算。 呢期重點VR概念股數字王國547，一直對科技股有D抗拒，一係真正做事的公司唔多，吹水就成街都係(無幾多間A記同G記)；二係唔識創新無技術或者孤芳自賞，不思進取。數字王國以前主要做金屬廢料貿易，去年開始剝離傳統貿易同發展媒體娛樂業務，可惜媒體娛樂業務虧損差不多8000萬，暫時幫唔到手。但睇翻集團的部署，由去年九月周永明(前HTC高層)加盟數字王國，為集團進軍台灣市場走出第一步；十二月集團以3890萬美元入股加拿大VR技術公司IMV，佔已發行股份53.9%；今年一月用1.35億收購Post Production Company Limited的85%股權，呢間公司係香港現時做電影後期製作最大幾間之一，參與作品有‘1942’， ‘捉妖記’， ‘九層妖塔’同‘ 親愛的’，證明國內關係網絡良好，可以好好幫助集團在國內拓展娛樂相關業務。至於VR技術方面，市場目前不單止應用在遊戲上，甚至教育，工業 ，軍事同醫療都有應用；所以好多科技巨頭正在努力開發VR相關硬體，好似Hololens，Google Cardboard，PlayStationVR同Samsung GearVR，預期VR硬體越來越普及會對集團業績起正面作用。消費者買左呢D硬體後最需要就係多元化的內容，剛好集團主力就係幫硬體製造商製作高質數的VR圖像同360度即時媒體內容(今年二月就同美國廣播公司合作開拍首個360度網絡電視直播節目) VR和360拍攝發行亦會係集團未來的業務核心，唯一擔心係業務的爆發完全要睇VR硬體的普及速度，只適合中長線持有，現價可以買入，一年目標價1.0。 下星期輪到隻牛奶股蒙牛乳業2319

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 一沉百踩，自求多福 老美非農數據又出奇地好，呢次真係全世界做傻仔，無人估到究竟4月加唔加息，睇利率期貨就機會唔大，但係市場反應就好似好有機會加咁款，星期二歐亞美齊齊中招，無端端跌到反肚(除左阿爺個市)，網上搵左成晚，個個話避險，避乜鬼險，無恐襲又無射導彈，唔通希拉莉輸幾場預選，加上特朗普失利，萬眾期待的希特對碰有變數，令老美明年政局出現不確定性引起？總知就高位個個走人，大家都無心戀戰；耶阿姨好似星期四晚又有talk騷，真係要睇下會唔會放完白鴿又放鷹，要留意係杜指破頂不成最近支持位在16925附近。 希臘遣送部份難民過程順利，應該暫時放低難民問題唔炒，於是焦點又落翻去銀行度，德意志銀行黐住個52週低位行，默師奶民望又插水，歐洲未來一年1的經濟可以話係步步為營。DAX短期企唔到上去10000點，睇怕都要見9300呢個支持位。一個唔好彩講中左，恒指期貨真係去到21020就無貨賣，然後級級落，散戶高追等衰，莊家就豬籠入水。20600淡倉期權依然賴死唔走，睇怕都要落一轉19400附近先滿意，除非阿爺又救市(出重大利好，不過可能性好細)。禮拜頭高盛吹風，三月亞洲貨幣彈高左可以沽得，重要唔止人仔同港匯，其他國家都有份，講到似層層，話某D貨幣重要打個9折，時間上同老美數據好配合，先出靚非農，再出面唱淡，如果耶阿姨真係出口術，你話巧合我都唔會信。 A股宇通客車派2015年成績表，淨利潤增長21%賺35億，新能源汽車銷量同比增加接近兩倍，睇落國內經濟又唔差喎；咪住! 睇真D, 原來收左阿爺68億半補貼，心算唔好就搵個計數機自己計，咁樣講隻BYD盤數都好牙煙喎。阿爺又俾人調低評級，就差惠譽未出聲，咁搞法重入唔入到MSCI都成問題，萬一真係入唔到，大家又一次預期落空(可能大家早有準備)，齊齊沽貨離場，事隔一年A股又再重演帶領新興市場跳水，咁樣就滿分完成高佬預言，希望只係我杞人憂天；剛剛豬肉價格又創新高，突破2011年6月歷史高位，預告大家下次公佈CPI回落機會又接近零，降息無望，加上從2014年開始，M2增長和GDP增長的差距越來越大，證明貨幣嚴重增發，人仔進一步貶值已經係無可避免(咁都唔貶值真係可以得諾貝爾獎)。歷史往往重演，14年股市加槓桿，15年爆煲；15年樓市加槓桿，唔通16年爆煲？債轉股講到重磅利好，問題係幾大收買佬(信達係其中一間)都唔要，到底係手頭無錢要唔到(佢地肯要又手頭唔夠錢，銀行俾credit都好過自己攬上身卦)定係已經包到嘔塞唔落就只有佢地先知；債轉股講白D就係債仔無錢還就同債主講撇左佢條數，檔生意賺到錢就分紅俾債主(生意好就有錢還啦，重使乜賴數)，心諗萬一又週轉唔到，債主洗濕左個頭，無理由俾佢死，又要泵水救佢，點知幾時先返到家鄉，唔好害銀行喎。 呢期講隻統一企業中國220，集團以台灣統一企業集團分公司身份在國內生產同銷售統一品牌飲料及即食麵；現時擁有53條飲料生產線同50條即食麵生產線。如果有留意呢隻股票近幾你走勢，會發覺可以用飄忽兩個字形容，如果要搵原因，主營利潤明顯受到原材料價格影響，特別係聚脂切片同糖；近兩年又無乜新產品賣得好，舊產品又開始多競爭(可口可樂同出前一丁都係全世界得一間，想搵多間都難)，銷量肯定有下降；最近五年生產線升級都加重左集團的財務負擔，同時亦為統一在硬件上拋離同業對手康師傅同娃哈哈。天氣亦係一個大家把控唔到但又影響甚大的問題，試想想夏天頂多31，32度，飲料肯定賣得唔好，原來而家賣飲料都要睇天做人，真係生意難做。好彩15年的兩隻新產品，海之言同小茗同學都賣得好好，今年應該業績會更上一層樓；如果天公造美，今年夏天好似13年咁熱，業績肯定會錦上添花，加上2015年業績顯示集團無論在毛利率同淨利率都有明顯的增加；同時負債比率和存貨週轉率亦有改善，唯一美中不足係管理層偏向保留現金在手，派息率只有偏低的20%；雖然股價在近期高位，現階段仍然可以買入，半年目標價7.5。 下星期輪到隻VR概念股數字王國547

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 女人心，海底針 老美數據理想，假期前幾個行長又吹風話應該提前四月加息；鬼估到耶倫阿姨會玩彈弓手，發個聲明話今時唔同往日，條件無舊年咁好，要用特別審慎態度(好彩無話停止加息，唔係就真係玩死人)去決定加息，重語帶雙關咁話要注意低油價同中國經濟走下波可能影響美國經濟復甦(大家知道祖國經濟有幾好，咁樣講不如直接話唔加好過啦)，真係等加息等到頸都長。阿姨一放白鴿，個市即時識飛，跌成百都可以倒升幾十，真係神符其技，上個禮拜話要加息班官無料睇錯市定係呢兩日個市突然轉差(其實都唔係，阿姨想搵藉口等最有利時間加息就真，第四季GDP又好過預期，點會連加少少息都驚)，總之就搞到炒家失預算，連央媽好聰明咁將人仔牌價跌定先都中招。發覺由格老，伯叔到而家阿姨掌舵，聯儲局漸漸成為老美政府影響世界的政治工具，投資者以後又要考慮多一樣因素。自歐洲央行放水以來，股市開始有D老美09年個樣。跌完又升翻上，一時間好似陰霾盡散，好到大家都唔信；但係歐洲部份國家的銀行問題(老牌如德意志銀行都有份)，完全唔似有本事解決到，連緩和都好似唔覺喎。最後一樣要注意係比利時恐襲後市場無反應，表面睇個市好安全，但就加大左英國脫歐預期，呢個計時炸彈爆唔爆好快知。星期二恆指期權20600call做左大手，連埋成本計個市要升到21050附近(根據莊家過去做反手盤表現)，當時心諗無理由升咁多卦，點知聯儲局隻白鴿一出就挾去20900，又一次證明大戶無傻仔；不過奉勸散戶一句，唔好心雄調頭追call，皆因20600期權淡倉無走到，呢次急升似震倉多D。上海同深圳先後出樓市辣招，房價回唔回就唔知，但量就肯定從而家開始跌，呢輪樓價急升又唔知幾多無知老百姓坐左艇；其中深圳辣招影響重大，因為按新規定，買家想買套70平方(大約760呎)就要300萬多DD(按4.6萬一平方算，龍華而家都叫8萬幾一平方，4萬幾一平方都已經好難搵)，買家7成按揭20年，月供15000，買家要證明到自己每個月有30000收入(要以個稅或者社保供款做證明)先有機會同銀行借到錢，大陸人咁聰明識避稅，又有幾多個夠料證明。北京住建委嚴查房價，高價學位房通通從中介下架，央媽唔通真係決心打壓房價？其實呢輪房價狂升主要因為之前調控無效，股市又一潭死水，中產階層於是急於入市，有錢人(包括發展商)當然托高出貨，其他投機資金加入引起羊群效應，甚至不惜加槓桿(借貸)追貨；站在陰謀論角度睇，想有效綁住資金阻止外流，製造房價大升預期，資金(炒家同用家)自然聚焦樓市，然後高位橫行，只要唔大跌，銀行無風險，資金又鎖死，高位可以套現都係有錢人，佢地D錢要走都早走左，影響唔大(偉大領導人話過俾一部份人先富起來)，而家只係犧牲小我，完成大我。朝鮮再次推行糧食節省運動，用意很明顯就係將矛頭指向老美同其他國家(因為受到呢 D國家制止)，多少可以睇到肥仔有決心同其他國家鬥爭落去，甚至乎不惜一戰。 呢期輪到隻昆侖國際金融8077，集團主要從事槓桿式外匯，證券業務，現金交易業務同其他金融服務。引起興趣源於集團2月2日發盈喜，預期截至去年12月底相關年度本公司股東可佔溢利將大幅增長不低於250%，但業績顯示只稍稍超過150%，唔通寫稿個同事擺烏龍(因為剛好係對比去年不低於250%)，咁樣真係要懷疑佢地個管治水平；同行前輩提醒，集團去年10月亦發過盈喜，當時預計截至去年9月底的9個月股東可佔溢利約為2014年同期的 500%，先看看數據：去年第1季純利1258萬元；第2季純利2263萬；第3季純利3924萬；如果全年純利增長不低於250%，第4季度純利最少都有4800萬，結果係公司去年度全年純利只有9471萬，按推算第4季度純利只有2026萬，第4季度純利大跌原因係公司突然出現一筆大約1270萬匯兌損失，但又點解釋前3季公司可以錄得約1080萬匯兌收益；中信入股後並無在管理層上出現變動或再進一步動作(可能為左免除日後某些業務可以避開監管上的約束)，睇怕未來都係做中信的御用金手指居多(個人並不喜歡呢類型公司，因為會以政策任務行先)；最後有兩個疑點就係集團頭3季業績都有公佈客戶增長人數，但全年業績反而無，全年純利有大幅增長情況下反而唔派末期息，好似完全無為散戶著想(會唔會係中信入股原因)。不建議持有，應該盡快沽貨。 下星期講統一企業中國220

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 時不與我，奈何奈何 比利時受恐襲，滿目瘡痍，場面震撼；市場反應短暫，各個市場收盤計數好似無事發生，只係小幅上落，唔通覺得只係單一事件，唔會再發生，所以無有怕？我覺得係大戶成手貨轉唔到身，點都頂主先散埋水先。股市債市當歐央行放水無到，股同債價都無乜郁，唔通真係好似專家話放水已經解決唔到問題？但要注意最近公佈的幾個德國數據：1月份經調整德國工業生產指數年比上升2.2%，遠超預期的跌1.6%；1月份工業生產值升3.3%亦都遠好過市場預期升0.5%；製造業PMI亦都在盛衰分界線上的50.5(已經係從2014年11月以來最低，不排除德國製造業開始就下坡，歐洲龍頭都咁樣，其他D國家更唔會好到邊)，個市咁都升唔起，有乜風吹草動實行四腳朝天，歐洲而家唔適合入市住。老美三月唔加息，大家又要再驚過，都唔知幾時再加，4月定6月，或者更遲都唔定，計我話長痛不如短痛，早加早著，利率期貨表示最快6月先有機會，但又有D官話市場無惡化就可以考慮4月加，真係佢地玩晒，不過S&P期權2000點樓下開左淡倉，邊走邊食，小心一隻黑天鵝就玩死全世界。阿爺剛剛鄭重宣佈考慮推出Tobin Tax托賓稅(一種為左壓制匯率波動同資本外流而設的稅)，睇怕之前為左保住離岸人仔匯率已經引至元氣大傷，有必要在外管方面郁手收緊，咁搞法好似一入SDR就過河抽板，以後重便有面話係負責任大國。從網上非官方資料顯示，農曆年後包括光大，招行，廣發在內好幾間股份制銀行放margin倍數由年前的1：1到而家1：3，如果通過一D渠道，最終結果可能去到1：5咁高，利息成本超過6%；奇怪係之前唔係掃清場外配資咩，點解而家又搞，唔通股市真係又大升？事實係全國經濟環境唔好兼資產荒，銀行借錢俾企業風險重高，咁不如借俾你炒股收下高息(聽聞而家5%就要補倉7%斬倉，不過太大舊貨夠唔夠轉身又係另一件事)，好容易又整多劑6月股災；另一邊又傳聞投貸機制(即係企業借完錢無錢還，債權變股權，銀行上身)可能推出，意圖係希望銀行唔好迫企業倉，等企業可以抖下氣，但係銀行一開始就要諗會唔會債仔變股東，企業借錢更難，唔使幾耐民間貴利佬又生意唔憂做，問你點搞？根據媒體報導，中國證監有一份黑名單，上面有三十幾間公司，已經開始調查同必要時退市，希望唔好太多散戶輸到得翻條底褲就好。香港個市一直似挾高結算(因為淡倉期權唔願平倉，要上都要落一轉)，但係好衰唔衰比利時出事，朝鮮細金又亂搞，好友算盤打唔打得嚮好快就知。   呢期輪到隻亞洲水泥743，母公司係台灣亞洲水泥集團，主要從開採至分銷各種水泥同預拌混凝土業務，主要生產基地分佈江西，四川同湖北。同國內其他水泥公司一樣，都因為早年過度擴張，伴隨國內經濟下行引發產能過剩，呢兩年都係得過做字，可以減產就減產，錢又賺唔到；加上央媽近年鼓吹企業合併，供給側改革，好似亞洲水泥集團呢D所謂入口品牌(大陸一直無當台灣係外國)要進一步搶佔市場份額真係談何容易；房地產又進入去庫存，未來幾年業績都唔會好到邊。去年盈轉虧就意料中事，每股虧損0.191元重可以派5分息，睇落應該係為左賣殼做準備，將現金資產值減到最低，起碼大股東收得幾多就幾多，雖然每股帳面資產淨值差不多6元，但由於同業山水水泥去年試過債券違約(來自中國銀河國際2015年12月的行業報告)證明左生意唔好做，真係甩唔甩到手都好難講，而家市值都差不多26億，要賣亦都唔好賣。每日成交量又唔大，有貨在手就快D沽，反正高位坐左艇都唔好望翻身，輸少當贏都執翻身彩，情願真係有日成交大增就追入搏停牌。 下星期講隻昆侖國際金融8077

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 千呼萬喚始出來 歐洲大手筆放水超過預期，剛宣佈結果匯價即時腳軟，點知記者會一開就因為行長一句話無再減息可能，會考慮用其他工具刺激經濟，匯價即時拗腰抽上，前後回左半個鐘唔到，睇落大家對歐洲整體經濟都投信心一票。歐洲近幾年能夠經濟復甦，當中德國貢獻最大，基民聯地方選舉失利，好多人猜測默師奶會因為難民政策引起管治危機，甚至乎連任唔到，若果單論政績，完全搵唔到其他人去代替默師奶，好大可能係險勝需要組成聯合政府。敘利亞停火有效舒緩歐盟在照顧難民潮要面對的財政壓力。朝鮮細金越玩越開心，又短程導彈又話要先下手為強，重吹可以射到紐約，睇落最後都係無乜料(手上無籌碼，邊有本事硬撼硬)，似靠嚇多D。香港就麻煩少少，恒指期權20000點short call唔走重要呢兩日開埋20400點long put，照睇就無得升，但呢個禮拜好友出晒力頂住個市，好似想頂到結算咁款，但重有個幾禮拜先夠鐘，我就唔睇好。又輪到耶阿姨出場，大家都話唔會加息，之前樣樣數據都靚仔，就呢幾日先出個數據差翻D，又似有理由唔加息住，世界邊會有咁多巧合？兩會開完無驚喜，總理好有信心咁話今年GDP無可能唔達標，因為祖國搞供給側結構性改革，成效如何只好拭目以待(國企改革都講左好耐，一直係只聞樓梯響不見人)。開會期間金魚缸明顯有人維持秩序，開完會個市走唔走樣真係唔知，但戰略新興板又傳可能唔玩，若果傳聞屬實，企業又少左個吸水平台，經濟下行的環境底下，唯有希望呢個冬天不太冷。要注意呢幾日指數接近全日高位就見到期貨出現大手沽盤，後市應該唔多看好。 呢期講下隻永嘉集團3322，公司主要幫 adidas(目前亦係adidas全球最大供應商，雙方合作超過20年)，Reebok，Umbro同Diadora 呢D國際品牌做運動衫，而且中港兩地自己做埋運動服零售；用D-Mop 品牌經營中高檔次時裝零售的同時，更擁有多個日本品牌在某些地區的獨家分銷權。唔似其他生產廠家，近年集團已開始轉移生産線去越南同柬埔寨，不單止有效降低成本，以後重可以受惠TPP(跨太平洋經貿夥伴協定)關稅優惠，在同行業中提高競爭力。集團剛剛發左盈喜，預期截至去年年底為止，全年純利按年增長6.5倍；表面睇係因為出售已關閉廠房的土地使用權，但有一點比較吸引，就係中高檔次時裝零售業務好轉(舊年經濟咁差都有好轉)，今年應該表現會更好。值得一提係NIKE早幾年因為Air Jordan波鞋走紅連帶其他服飾業務都受益，公司市值也創高峰；去年adidas先後推出Ultra Boost同Yeeze兩個熱賣款式，熱捧程度同iphone無乜分別；本週四開賣萬眾矚目NMD鞋款(量產款都1000，聽聞限量款接近5000)，國內搞到週三朝早就有人排隊等開賣，真係一鞋難求，NMD同adidas套裝已經成為潮流icon，fans都以擁有為榮，永嘉自然水漲船高。 股價已經成功守住1.10，加上預期訂單增加，有效控制成本，TPP利好等等，現價可以買入，半年目標價1.65。 下星期講隻亞洲水泥743

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. QE，散戶等著你回來 歐洲呢個星期四就開會， 大家都期望落劑重藥谷一谷，但係歐元開會前見底企穩，點都唔似會開大個水喉放水，無理由無人收到風沽定歐元先。德國IFO商業景氣指數同商業預期指數都差於預期，加上多項數據近幾個月都走低，某程度上支持歐央行進一步量寬。睇下面個圖就會發現連債價都只係升少少，更唔似大手筆放水，預期失落又唔知要跌多少。   老美GDP增長穩定，重可以算係好過預期；剛公佈非農又超靚仔加上失業率長期處於偏低水平，乜有利加息條件都出晒，前費城聯儲主席重話應該加0.5%，真係想人死咁款。但係諗深一層，耶阿姨無理由加完息話咁快就放軟手腳，咁即係自己打自己兩巴，重記唔記得之前佢話過老美身為負責任大國，加唔加息除左睇自己經濟表現，重會照顧其他國家感受。咁就出事，呢個星期新興市場就全面反彈，即係話頂得住加息；商品價格又大幅抽上去，容乜易通漲出現，睇落要耶阿姨唔加息好似真係無理由。香港就升升跌跌，但恆指期權19000 short put平左倉，應該無乜大升機會，因為重有大手2000 short call未走；反而國指要小心，期權7000short call點都唔走，重要開埋8400 long put，應該點都要再跌一輪。阿爺出口數據跌兩成，創七年最大跌幅(七年前咪09年頭，金融海嘯剛剛爆呔)；出口急跌主要由於人仔升值，實體經濟又欠支撐，睇下個個都去炒樓，搞到樓價就升到無人信，生意反而無人做；樓價貴左買唔起都唔怕，有人借埋首期俾你，一條龍式服務反影樓價已經脫離現實，只能成為好似股票咁樣的金融工具，睇下邊個接火棒中招。 呢期隻主角安全貨倉237， 集團主要經營貨倉同地產投資，之前賣得成柴灣貨倉後(折合股東應佔權益每股約13元)手上大把cash，而家得翻觀塘振萬廣場(連101個車位)同國瑞路安全貨倉，估計呢兩件貨大約值33億(折合股東應佔權益每股約25元)，扣除相關物業減值，兩邊加埋每股點都值30元。加上集團近幾年開支又唔大，無特別錢要用，差唔多每年經營溢利都派曬俾股東，所以一公佈賣左柴灣貨倉股價就彈升兩成幾，各方友好都估計會派特別股息，唔係點都唔會咁癲。睇翻2010年當時保留過一筆資金打算重建國瑞路安全貨倉，點知城規會唔批，集團2011年尾就將筆錢當特別股息派翻俾股東，証明集團唔喜歡留太多cash在手，偏向派息，股息年年有兼夾高，吸引一班好息之徒捧場，單股價呢幾年就升成10倍，真正財息兼收。大股東一月中重夠膽每股作價18.62場外增持300萬股(大老闆都唔覺貴，肯定有後著)。由於創辦人舊年仙逝，家族成員好大可能賣貨倉派高息分家產，呢種動作唔新鮮，近年就有創興銀行做例。如果無估錯，四月中會開始越升越有，到六月派全年成績表時公佈派特別股息。預計目標價24元。 下星期講隻永嘉集團3322

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 東風吹，戰鼓擂 阿爺放完假派利是，唔理你假期外圍跌到反肚，開市兩日都力頂(起碼第一日裂口低開都撐翻上去，對得散戶住啦)，完全無補跌，阿爺要親自出面維持秩序(假期不斷出利好消息)，散戶醒目就先散水，走遲左可能無機會。1月外儲又跌成千億，雖然比預期少，但係大數得3萬幾億，咁少落去用乜易乾塘(唔係話貿易順差咩，點解重會少咁多)。央媽發文件容許符合條件 (年收入不低於50萬，名下金融資產不低於300萬) 的個人參與銀行間市場債券交易，進一步發展債券市場(個格似銀行甩唔到手搵散仔接貨多D，直情係簡陋版雷曼)，銀行搵唔到客借錢都唔玩，好極有限。1月個市好成點有眼睇，新增貸款竟然大增，好多名嘴都話唔知點解，計我話呢條數唔放出街，過完年有幾多公司開門真係唔知(國內已有傳聞有公司被勸告不能倒，無錢出糧可以先拖住的講法)，加上中國人要面，做得老闆點會想年尾執笠，過年重點見人；重有係企業預計好快人仔撐唔住，拿拿聲借人仔還左美金先；最怕表外貸款而家浮面，因為企業貸款增加二萬億，企業貸款八千億都多唔到，錢去左邊就自己估。香港就彈下回下，上週五期權19000呢個禮拜就到左，其他為無乜動靜，不個啤啤熊19500俾莊家掉到隨街都有，小心殺埋熊仔先落。瑞典央行下調利率，多間歐洲銀行股價跌破近年低位，當中包括意大利同希臘D銀行。沙特同阿聯酋又話要派地面部隊去敘利亞，D油咁都彈唔起真係前途似咁；幾大巨頭坐低傾減產又唔成事，睇怕老美好快有能源公司頂唔住，大盤跳水又大把平貨執。 呢期輪到隻和美醫療1509，目前中國最大婦產科私家醫院，旗下11間醫院分佈7個城市，當中北京同深圳醫院收費最高，生仔套餐5至6萬人仔，坐月就盛惠5萬8(又真係幾貴)；整體員工數目接近1400人。估計15年全年業績放緩，原因係國內人不喜歡羊年生B，16年業績應該會有明顯增長；二胎政策落實執行，很大程度上會助推業績，加上現時病床使用率只有不到60%同年底會有新醫院投入服務，業務增長唔會造成人手同配套上壓力。集團亦計劃年中全面加價5至10%，預期可以改善20%盈利表現。要考慮係集團客戶以中產階層為主，二胎政策能起多少催化作用言之過尚早(有錢早就生左，未生就政策放開都不一定生)；由於人口政策的影響，預計每年出生人數只會有序下降，唯一可能出現爆發期只有明年，之後日子就要同其他公立醫院，私立醫院爭客，口結果亦係估唔到。舊年7.55 IPO後最高見過8.4，之後就潛水，可以趁大市回調時在5.8附近買入，目標價7元。 下星期講隻必瘦站1830

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 熊市還未完結，散戶仍需忍耐 呢個猴年好熱鬧，重未開始金同志就除夕放衛星，搞到日韓呱呱叫；阿爺出奇大反應，又譴責又交涉(呢次燒到埋身唔出聲都唔得)，但表態唔想經濟制裁朝鮮(話怕有難民潮湧入中國，咁都得？)週一只要有盤開D市場都腳軟，都未話有乜進一步行動就反晒肚，好似跌過左籠；話口未完南韓向朝鮮隻船開火驅趕，個市要反彈真係想都唔好想。上星期提過金價可能短期見底反彈，果然在金同志除夕表演影響下應聲彈起(唔通又有人事先知道)。而家最尷尬就係韓日只要一裝老美套防禦系統，就隨時有可能擦槍走火，唔裝又怕唔安全，萬一出事散戶又要捱沽(家陣都搵錢至上，打仗肯定唔會)。美國最近數據靚仔，除左非農數據出乎意料差左，其他數據都支持三月加息，但會後聲明同非農都傾向鴿派，唔支持短期加息；睇大盤就好似頂唔住，加息後無段好睇，越落越有，關鍵在美匯指數破唔到頂，100都企唔穩，升值預期唔夠，D錢又點會急住去買貨，但小心係老美個局，等美匯空倉夠多，一劑挾爆淡倉，用補倉盤推高美匯，引發資金回流扯高股市(呢兩日外匯市場美元匯價好似沽唔落)。特朗普在黨內初選剛下一城，如果最終俾佢坐正，阿爺明年呢個對手都好難搞。德國財長話德國可以在15-16年度會完全消滅赤字，默師奶掌政10年功不可沒，雖然難民問題引起國民不滿，但德國無默師奶就無今日，相信國民重會想佢連任，繼續呢種好日子。歐洲銀行股價屢試新低，德意志銀行創金融海嘯後新低，瑞士信貸銀行跌落24年新低，投資歐洲市場睇怕都係遠離金融類股票好D，由於整體經濟復甦(起碼最壞時間已過)，零售和服務類股份可以優先考慮。香港年初一就出大事，但好奇怪，國內媒體對呢件事報導得好低調(唔通怕影響過年氣氛？)。上星期先話左期權個位做得好低，點諗都諗唔到會咁淡，點知內憂外患(朝鮮加上旺角事件)一齊到，大家扣好安全帶坐翻轉過山車，18300守唔住就17200見，國指關鍵位7300。阿爺過年放假無突特別。 呢期輪到隻嘉里建設683，集團擁有三大業務版塊，包括物業銷售，出租同物流(已分拆嘉里物流636上市)。關於物流業務對集團利潤的貢獻可以忽略，因為波羅的海指數一直低完在低，幾時蝕本幾時穩定都唔知；租金收入將會係集團賣點之一，對比SOHO中國優勝地方在於擁有酒店業務，但大部份都在國內，同樣要面對經濟下行，人民幣貶值的不利因素。最近財報顯示租金收入有低雙位數增長；物業銷售方面錄得倒退，金額同毛利都高雙位數下跌；加上集團每年淨利息支出接近10億，派息率唔高同時國內經濟開始加速下行，集團更要面對相當高匯兌風險，包括美元轉強後造成美元和港元的債務利息支出增加，主營業務收入的減少，重有房地產市場下跌預期，雖然現時每股資產值約56港元，綜合各個不利條件後，每股合理值應該在20左右，在14元附近可以考慮買入。 下星期講隻和美醫療1509