虛勝實，不足勝有餘 恒指上完23000撻落黎，上期稿變左遲來的忠告；如果呢篇稿見街時又守唔住22400，大家有貨就要小心。提醒大家期權重倉位22200同22400call，put就21400；至於啤啤熊重倉位就已經一命嗚呼，牛牛就在21500附近，大家應該知道個市會點行。阿爺個市自從11月初大成交抽高然後橫行縮量派貨，每次都係踢高就回，資金明顯計數離場(人民幣入SDR都唔睇好？)，但大戶12月期指開好倉底，睇下出乜招數抽上去(開倉位置在3580附近)。利空消息一大堆，我就只講三個最大影響的，一個係救市國家隊26個成員一查就6位，一般都係越查越多人落水，大家為左表示清白(消滅罪證)，沽有問題D貨好正常；第二係證監會叫停券商融資類收益互換業務，簡單D講就係清理完場外配資後，輪到領正牌D券商，新一輪沽貨潮又好快再出現(借A股春節前例跌乘機抽水)，個市過完呢波就可以健康發展；第三個就係北極熊宣報將人民幣納入外匯儲備，間接支持左人民幣入SDR，隨即宣佈經濟制裁土耳其，利空原因係北極熊本身經濟低迷，明顯拉住阿爺呢個救生圈，咁就可以放心搞低土耳其，唔怕受歐美制裁，但阿爺就豬八戒照鏡，左右做人難。歐元在預期12月加碼放水情況下，兌美元創近期新低，估計加大量寬後有望反彈至一歐元兌1.08美元附近；巴黎恐襲後並無構成新一輪拋售潮，相信歐洲市場再大跌機會唔大，除非反恐全面開戰。美國就等16號宣佈加息，但剛過呢個禮拜D數據又唔多靚，唔會又玩空城計唔加息卦。香港有秋官效應，但我地大當家每次出行就A股跳水，可能形成另一心理效應。 1566華夏動漫今年三月上市，集團的主要收入來自與動漫衍生的多項業務，包括玩具和相關的增值服務，客戶群主要來自日本玩具公司，像世嘉和Tomy等等。集團在上海與日本世嘉開設Joypolis室內動漫遊樂園，項目一期虛擬體驗館今年已投入營運；項目二期將在年底開業，全面開放後，估計入場人數全年在100萬人次左右，收入約達2億元；加上電影投資和製作，音樂動漫演唱會，手機應用等多媒體動漫娛樂，業務範圍較其他的同類型公司要闊很多。重點提一下集團運用虛擬實境技術打造的動漫偶像紫嫣(類似日本的初音未來)頗受歡迎，從之前深圳舉辦全中國第一個紫嫣·Violet動漫偶像3D演唱會大獲好評，高達900元的票價錄得進場觀眾人數7000多人，600多萬元人民幣的票房收益。其實VR技術早在60年代就具有雛型，90年代試圖商業化又未嘗甜頭，自去年3月Facebook以20億美元收購Oculus牽起VR概念序幕開始，Google，微軟和Sony這些巨頭都先後重金投入VR的應用研發，連帶具VR概念的股都雞犬升天，1566就係其中一隻。看好原因還有市場一直傳聞騰訊有意入股和進身MSCI指數成份股；風險就係PE手頭股份已過禁售期和9至12元係蟹貨重災區，建議在6.3買入，目標價9元。 下星期講隻合生元1112

已是懸崖百丈冰，難有花枝俏 呢個星期個個都講反恐，A股重啟IPO，我就講下其他。波羅的海指數同美匯一個近期低位，一個就破100，話經濟好搵你信。週初睇到篇關於馬雲的訪問，內容大意話未來幾年中國經濟靠內需帶動絕對無問題，論點以我睇就似為自己多，點解？佢話單睇雙十一就咁好生意，國內消費力有幾勁大家有目共睹(咪住，舊年已經俾人質疑退貨率奇高，個個怕手慢買唔到，有你無你買左先，反正取消唔收錢，今年我身邊就有朋友買左四件最後全部取消，加上有D客因質量問題退貨，咁真正賣左有幾多？)；又話國人消費模式已經改變，唔再似以前咁死慳死抵，一件衫著幾年，近年已經向西方睇齊，接受預先消費(呢點睇國內信用卡消費增加可以證實)，80後90後消費力就夠支撐中國經濟，帶動內需(人地西方國家福利好，退休同病都唔怕，大陸好似呢兩瓣就差少少，重有係呢班人都去左消費，D樓邊個買？)，講到大陸無電商就經濟無望咁。其他消息重有截至10月底，單月四大行存款流失4474億，貸款額6年來首次負增長；中證監取消券商自營股票淨買入限制(唔係話4500點先沽咩)；住房公積金管理單位可發行住房公積金個人貸款支持證券，近似我地MBS(目的究竟係將銀行風險轉移定係增加流動性俾人借錢買樓救樓市？)；國內銀行開始有估唔足價情況，樓市泡沫應該燒到埋身。總結一下，我仍然看淡未來3個月的A股和國內經濟走勢；前輩黎Sir重話人民幣入左SDR後唔貶值就走翻日本條舊路，通縮可期。講到咁差但大家睇定先好沽，事關阿爺12月期指係好倉底，所以點解呢幾日跌唔落。香港就挾兩日無貨賣，維持原判，22400企唔穩再穿20000的話，我地21000點見，跌唔穿頂位俾盡22900(就怕阿爺頂住唔俾落)。歐美市場重點放在12月，一個收水一個放水，落實左大家好炒，一日唔落實，個信心都係差D。補充一點，土耳其打左北極熊架機落黎，小心借故大調整。 彩星集團635，第一個印象多數會想起隻忍者龜，答對左一半，隻龜係集團下面個仔彩星玩具所有，集團除左做玩具，重做埋物業投資，當中包括尖沙咀的彩星集團大廈，屯門彩星工業大廈和麥當奴道半山樓25個單位(要注意該類型單位2011年成交價係2000萬，25個就盛惠5億)。計完磚頭就計下隻龜，2014年純利4.9億，阿媽佔一半，又袋2.45億，明年隻龜有戲上，應該會衝一轉。至於其他物業管理和餐飲業務，對整體盈利貢獻輕微，可以不理。具體講完就同大家計條師奶數，個仔市值22億，淨值約11億(按每股淨值0.89計)，阿媽就市值20億，淨值約61億(按每股淨值27.8計)，61億減22億得翻39億，攤薄每股淨值約17.6，股價折讓近一半，公司負債低，同時每月租金亦為集團提供穩定現金流；根據港交所紀錄，集團在11月先後5次在8.8回購，在6月時大股東持股量超過45%，估計連自己人總持股量已經超過6成，手頭現金又充足(派息率超低)；估計大股東快有動作，最大可能係Leverage buyout。現價8.9，投機性買入，目標價13；要注意呢類型股份如果3個月內無料到就唔好等，費事失左其他機會。   下星期講隻1566華夏動漫

郁郁花都，中有碧血 剛剛呢個星期五可能係近幾十年黎最愁雲慘霧的星期五，簡直係散戶惡夢；法國恐襲事件(成手貨班散戶當時真係想死都黎唔切)，A股加融資保證金(好彩話23號先實行，唔係星期一又齊齊走貨，遍地屍骸)，姚剛下馬(傳聞係勾結外敵惡意做空)，雙十一電商銷售破紀錄(咁樣做900幾億，D實體店咪食蕉!)。香港個市就真係狂風暴雨，兩日唔見成千點；星期二下晝個市又彈唔起，期指臨收市急插過百點，22000開左新倉，如果企唔穩22400，咁我就在21000點附近等各位，祝大家好運。阿爺個市就睇落好平穩，大漲小回，打死唔落咁款；但20號左右有10間公司ipo公佈招股書，真係錢從那裡來；D屋仔庫存又高到領導人都關注，連地產中介都開口話明年一線城市最多10%增長，計埋資金同機會成本，我就唔買樓啦；cut margin搞到少左新錢入市，連週六傳人民幣月尾入SDR實食無黐牙都只係升左一日，咁個市邊有理由升。姚剛已經係一人之下，萬人之上，相信唔會再有更高層官員下台，算是長期利好。南韓大規模示威要求朴大姐落台，朝鮮就乘機抽水話要試射導彈；安倍多謝都黎唔切，點解？歐洲出事，亞洲d熱錢肯定搵yen做避險，咁安倍三支箭就應聲而斷，金仔搞事棍，地緣政治風險升溫，熱錢去左美元，yen能夠得以維持貶值，日本經濟先有機會復甦。法國出事，烽煙四起，打仗勞民傷財，戰事也只會是長久戰，對經濟疲弱的歐洲絕對不是好事。站在客觀角度睇，之前擔心難民潮對歐盟做成無法估計的經濟負擔，而家開始有歐盟成員國以安全為理由拒絕接受難民，相信陸續有其他成員國加入拒收行列(暫時放低呢個包袱)；歐盟國家出兵打擊ISIS，錢從那裡來？加大量寬係唯一出路，歐央行肯定送聖誕禮物，大家即管睇下會唔會。老美加息越吹越似，但歐洲戰線無可能少左佢呢個世界一哥，又加息又打仗應該頂唔住，估計老美會企後面打鑼打鼓，推法國佬去衝；加息？為左公信力點都年尾加一次卦(除非呢兩個月D數據神奇地大幅度轉差)。 至於科通芯城400，集團主要經營IC和其他電子元器件的電商交易平台和線上線下銷售業務；透過利用互聯網連思維建成供應商和採購商之間的供應鏈生態，主要針對企業型客戶。好多人認為電商平台市場差不多俾A字頭公司壟斷，其他公司能有作為，但科通芯城有一隻可能會生鑽石蛋的鵝，就是旗下的硬蛋平台。平台主攻業務就係兩年前有不少人睇好的物聯網；可惜經過兩年的發展，物聯網雖然在技術，思維和應用上都有了很大改進，但始終不成氣候。在過去幾個月時間，硬蛋平台上的項目已經由4,000多個增至8,600個，fans人數更達400多萬；現階段在亞太地區已完成香港和韓國市場的初步發展藍圖；集團又與百度簽訂戰略合作關係，重點擴展覆蓋軟體輸出和雲服務解決方案，有望成為全球物聯網創新的標竿；加上前微軟亞洲研究院副院長李世鵬出任集團CTO，除在北京開設體驗館外，集團亦在香港、美國、義大利等多個地方成立團隊，致力開拓海外市場。業務發展還在萌芽階段，但隨著市場的成熟，硬蛋極有可能以幾何倍數的增長為集團提供可觀的利潤。假設明年硬蛋能有兩倍的增長，可接受PE約在30倍，預期目標價為21；要注意風險係物聯網的概念和應用在未來一年能不能有突破性發展；還有是硬蛋平台上的項目和fans總數能不能保持強勁增長。 下星期講隻彩星集團635

重搥出擊，人人自危 呢個星期新聞多多，一時間多到日日有驚喜。由於對美元走強和人民幣偏軟的預期，9月份深圳金融機構的人民幣存款就減少約4000億，假設全國其他地方都面對同樣問題，保守估計整體流失約6000億(斷估有少無多，但其他非官方渠道流走幾多就唔知)，而家終於知道點解香港水浸啦!一直諗D錢點解入左黎又唔買貨，原來係穩陣錢，入黎做parking。徐翔亞媽手上D貨又凍結左，聽講佢阿爸都失聯；睇落呢場風都有排吹，唔知重有幾多人落水，不過個市守翻遊戲規則玩，最後散戶得益都係好事。通漲數據遠低於預期，加上重啟ipo，A股農曆年前例軟，過年前再降準機會十分大。風險要留意人民幣遠期合約出現大手沽空，好似有D唔多妥。滬港通連續十幾日北向靜流出，好似唔多睇好大陸個市喎，起碼唔敢坐貨。有一點要留意係近期部份ipo新股反應熱烈，熱錢好似偏好短線獲利模式，風險胃納細，只要市場環境穩定翻，好可能吹雞走人。恒指之前唔係一個美麗的誤會，都唔會挾得上23400；不過大家要記住，期權下面重倉位在21400附近，上面開call個位23400同23800，睇盤路似short call多。有一點同阿爺相似就係港元遠期合約同時出現大手空倉，一步一驚心。歐洲就傳年尾減息，但情況好尷尬；假設歐洲減息美國加息，此消彼長，歐元貶值(歐央行求仁得仁，刺激出口)，但息差拉闊好可能引發走資，能不能把握好都係未知之數。歐央行就算減息，銀行不一定借錢出去，錢放出去都未必會入去實體經濟(之前大陸官方都承認有同樣問題)，咁咪又係得個吉。老美就突然精神，數據離奇咁好(點解次次中國有利好都撞正美國數據靚，預期加息)，12月加息又講到似層層，感覺好似9月個樣。萬一阿姨又跳草裙舞，咁2015世界最大謊言非美國加息莫屬。緬甸大選結果，suki順利勝出，親美和支持工會的政策走向，對中國(政治)和外商投資(經濟)都添上不明朗因素。 今期主角盈進集團1386，集團主力鞋類批發和銷售，10億年銷售額加上有幾百個專賣店(包括Walker Shop)，業務單一；近年零售市道不振，股價低迷是意料中事。年中傳過賣盤炒左一浸，之後一直聽到聲但見唔到人。最近終於有D眉目，買家同264卓高一樣都係中弘集團，公告都出左話大股東同關連人事打算賣出不少於60%股份；加上呢次買方誠意十足，單單2500萬保證金(唔買就無得回水)，重要最遲11月30日俾offer，應該就差作價幾多，睇怕都實食無黐牙。 粗略估計盈進總估值10.5億(包括淨資產，手頭現金和淨殼價)，無溢價經攤薄每股收購價應在1.65左右；如果用手頭現金抵消部份收購成本(派特別股息)，收購價應該係1.4左右。現價1.09適合投機性買入，目標價1.35(預計以少量折讓價成交)。 下星期講隻電子股科通芯城400

精人出面，笨人出手 今個禮拜最觸目都要算國內所謂的私募一哥徐翔衰左，國內很多人俾佢評價係超級老鼠(意思係專做老鼠倉，重要大手做)；有前輩話搵個唔識經濟唔會資本運作都做到股神，信息有幾唔對稱可想而知，徐翔只係幕前演員，幕後導演係邊個都未知。至於上海自貿區的金改方案，加速左人民幣自由兌換的步伐(為入SDR做準備)；同時亦提供埋熱錢流出的合法途徑，呢把雙刃劍玩得唔好隨時損手。有媒體報導大當家話未來幾年中國的經濟增長最少都要6.5%，經濟照睇就麻麻，要達到目標都係要靠互聯網+同一帶一路，成績就等我地拭目以待。香港就簡單好多，渣打抽水，7供2重要裁員；匯豐個成績表又差強人意。銀行股無運行，隻企鵝D期權又睇得淡，個市應該都無得升啦。希望呢幾日唔好一挾就散，飲茶食飯都聽到散戶話要入市，唔係散戶又中槍，祝君好運。肥師奶一去大陸兜生意，大眾排氣事件又俾人翻炒，我點都唔信係巧合。歐洲如無意外繼續放水加減息，起碼都明年中先有轉機，暫時經濟數據無個靚仔，睇多半年穩陣D。美國佬唔加又加，而家又吹到似層層，好似12月唔加唔得咁款，但係經濟數據好壞參半，連上市公司業績都馬馬虎虎，點加得落手呀!某財經台個專家就提議不如加0.125%，加完就整招拖字訣，一於拖到大選後先算；嘩!咁都俾佢諗到。不過我諗得重衰，先年尾加0.25%(一般大選年唔想加息)，明年經濟好就無問題，唔掂就重新放水，大選前咁就確保經濟向好，拉票都拉多D，最後希拉莉上台，國民又可以憧憬克林頓時期的經濟大好。 今期主角北控水務371，公司主要業務包括污水處理，供水，設施的建造和銷售，技術輸出等等。北京控股為控股大股東，持有接近44%股份；實際控制人則是北京控股集團有限公司（由北京市人民政府出資成立於2005年1月），在與政府合作中，公司憑藉北控集團的股東背景優勢獲取回報率符合要求的項目。集團現階段集中在污水處理項目，由於擁有成熟的技術和業務平台，大大降低了開發其他新業務(污泥處理是其中一項)的難度。基於股東的特殊背景，資金充足帶來對集團快速擴張與涵蓋全國多個省市的支持，促成業務多元化，業績增長快；加上水價較為市場化，擁有穩定利潤空間。根據“十三五”計畫提出，實行嚴格的水資源管理制度，倡導節水型社會，節水規劃，雨水資源和再生水的應用，海水化淡，設立國家地下水監測系統，包括地下水的綜合管理。水價的合理制定同時意味著成本可以轉架消費者頭上，適當地舒緩了經營成本帶來的壓力。根據專業投資公司RobecoSAM近期發佈的報告中預測，水資源市場將在未來5年出現反彈，中國將會以10%的年複合增長率領先其他國家(除印度外)。公司的淨負債率高達112%，加上公司手上擁有189個項目在洽商或正在投標中，預期今年淨負債率有可能提升至130%以上，在水費正常收取的情況下，屬於短期風險可控類型。由於將進入國企重組改革時期，在互補互助的情況下，北控水務最有可能是和首創股份合併，如果真的成事，股價可以挑戰10元。現階段可以分段買入，合理價在7.8-8.0。 下星期講另一隻殼股，盈進集團1386

一失足成千古恨 阿爺又連續出招，房地產，汽車同銀行先後受惠，變相搞個中國版QE；老美搞阿爺又搞，人地越QE，錢越貶值，結果就緊係刺激出口又吸引外資，救翻實體經濟；但係阿爺個版本好似越QE人仔越升，出口越死喎!另一招更重手，就係信貸資產再抵押，簡單講就係另一劑次按，但人地百年老店都執笠，咁阿爺咪。。。之前有數據話地方債面數十萬億唔使，好似唔多喎；但底個數有幾多就無人知，官方預測得準就唔會有去槓桿出股災呢D事啦! 假設地方債出現違約，單一樣央行可以用乜方法去解圍，我都好懷疑。由於中國人天生賭性，之前幾年所有刺激方案，最後結果係D錢流曬去投機炒賣(講好聽D就係投資)；在這情況下實施量化寬鬆，結果就只有通縮；先是房價暴漲，然後貨幣超發，通縮發生，又一個日本迷失20年翻版，中國人應該要醒悟了。大鱷假如趁央行用錢頂住匯率，地方債出現違約先郁手做空中國股匯，央行點撐得住。細心一想，中國加入SDR唔通為以後同IMF借錢做好準備？又或者驚學左希臘發債無錢還？老美話咁快又上翻17000點，大選前一年真係大升大跌都無份，最緊要維穩。歐洲就峰迴路轉，敘利亞市民俄羅斯使館門口搞集會歡迎俄軍參戰，即時使館俾人炸；馬航客機重要證明左係俾俄製導彈打落，邊個打都好，俄羅斯點都甩唔到身，但呢次好奇怪，油價無大升。香港重利害，半個月高低波幅就千幾點，無乜特別就高低位出左，而家大陸出QE，恒指只要企唔住22500，估計21500附近結算係無問題，拭目以待。 今期重點信星集團1170，公司在1980年在台灣創立，主要從事品牌鞋類OEM生產加工。當中客戶有近年每個潮人都有對的New Balance，其他包括Asics，Timberland，Skechers，Clarks和Wolverine，單單呢幾個品牌就佔左總營業額85%。集團幾年前就已經積極籌組東南亞生產線，現時總共有44條生產線分佈越南，柬埔寨和中國，其中七成產能位於越南和柬埔寨，其中越南就佔20條，柬埔寨10條，中國14條。由於美元近期開始由低位回升，越南和柬埔寨貨幣大幅貶值；信星的好處在支出用當地貨幣，收入就係美金，有望在匯率差異上適當減輕中國生產線成本上漲對整體利潤的影響。由於呢類型公司沒有太高技術要求，行業入門檻又不高，所以只能用量搭夠，還好TPP預期會幫助集團的東南亞生產線多接訂單，日後有望在成本效益和毛利提升上作出貢獻。公司自從上市開始毛利率就持續下降，還好近幾年都能維持在15%附近，無明顯進一步下調。公司歷史PE大部份都在10倍到20倍之間，現時約14倍處於中間位置；由於接近70%的高派息率和股東經常回購，個人認為可以接受PE在12倍，加上近期創高位，等稍為回調再買入，長線可以持有，在1.6附近買入，半年目標價位在2.2。 下星期又講隻女人股維珍妮2199

兵臨城下，奮勇一戰 星期二上晝祖國數據唔靚遇上美國佬搞事，拉森號驅逐艦大搖大擺駛入南海兩個中國島礁範圍，重要hea左幾粒鐘先走；老美就咁瀟洒走一回，中國外交部高聲抗議(次次都呢招)，然後高層繼續開會，網民就個個咬牙切齒，大有不破樓蘭誓不還的氣勢，真係夠膽打，釣魚台早就收翻啦。跟手睇到中證期貨不停俾人大手沽落去，我諗住無死錯人，梗係又黎個高台跳水；點知阿爺出口術，話養老金明年入市，重話有兩萬億，散戶聽完成個high晒，即時國仇家恨都放開一邊，傻左咁跳入場；用下腦啦，養老金明年入市而家話你知？等你買先然後養老金高位接貨；自己買雞碎咁多錢股票都唔會啦，何況重話兩萬億，又一證明大陸散戶比較單純愛國，亞爺話乜就乜(引用香港俗語就係死蠢咁都信，唔死都無用)。德國師奶又快出巡要著數，看來又可以一顯我地好客之道，賣大包換朋友。阿爺要面對的問題多多，匯率要頂住(靠拋美元資產，隨時俾人衝擊匯率做成大幅貶值)，唔係年尾入唔到SDR；股市要挾高穩定市場情緒(搞多幾單國企重組合併，但精簡架構唔代表賺錢喎，睇中國中車就知啦)；鼓勵發公司債，開拓企業其他融資渠道(又伸手搵銀行同老百姓，邊有咁多錢，問機構？無錢還連公司都雙手奉上)；房價保持穩中有升(大回調就銀行同老百姓第一個死先，然後地產商，邊個叫多數開發商都借到爆額)；年頭開始不斷有大型民企執笠，未到年尾都咁樣，年尾就不敢想像。關鍵問題係以上所有問題一個都不能爆，我覺得長痛不如短痛。美國又議息，耶倫阿姨玩足全世界一年，而家都唔知信定唔信，陰謀論一D，會後聲明會比較鷹派，美元應聲抽高，迫央行出來頂著人民幣，削弱經濟實力。反正大選前都唔會利淡。歐洲方面應該借師奶訪華炒翻一輪，炒得幾高就睇有幾多好處在手，如果大眾排氣事件突然又舊事重提，咁就擺明司馬昭之心。香港市場就等美國加息，加完就有運行；如果短期唔加息，熱錢流出，港匯轉弱，唔通真係港元脫鉤？ 今期天喔國際1219在香港上市剛滿兩年，公司由一個有地區局限性，產品種類單一的中型經銷商發展成為全國性食品，零食和飲料生產和分銷商，當中包括自主品牌和第三方品牌。其中天喔茶莊市場定位較為高端，以中產階級為目標；在同類型產品當中，天喔比其他品牌康師傅或者統一都要高出約20%，官方解釋主要來自 一。比同業其他品牌更高品質的原材料，當中包括包裝用料； 二。產品容器，外型和標籤設計 三。眾多明星代言，包括張學友，范冰冰，黃曉明等等 加上陳列貨架與王老吉，奶茶這些偏高價錢的產品為鄰，巧妙地避開同類型產品拼價錢的尷尬局面。天喔上市以來一直堅持派息，最近的派息率約30%，如果可以提高到40%或以上就非常好；加上到目前為止從未出現高溢價收購，供股，大折讓配股同大手減持呢D小動作，管理層都算正派。最近與主要從事供應鏈管理和B2B市場業務的上海眾敏簽訂合約，重點在營銷和推廣方面的互惠互利。根據合約內容，天喔可以通過上海眾敏擁有的B2B平台去銷售產品，並獲上海眾敏承諾合作首年的銷售額不少於2億元人民幣；同時上海眾敏於合作首年也會向大約40間連鎖餐廳營運商推廣天喔集團產品，這正好改善一直以來天喔銷售點不多的毛病。但只有約17%的毛利率和品牌缺乏明星產品這兩點將是股價的致命傷。對比康師傅全國300萬個銷售點，統一的180萬個，天喔區區12萬個銷售點簡直是小巫見大巫，現時市值約53億人民幣， 12倍PE，成長潛力不容忽視。假如銷售點能以高雙位數的增長，扣除攤薄效應，加上品牌的市場定位清晰，預測15倍PE還可接受，現價2.6附近可以分段買入，一年目標4.0 下星期講下隻北控水務371

空城計，你我都中計 都話女人唔好惹，上星期四耶倫阿姨同班聯儲局官老爺重話緊經濟好，10月應該加息，信左佢講走定貨就真係大pan。星期五就話數據唔好，今年加息接近無望；美國佬真係咁公平，連阿姨呢D高官前一日都唔知發生乜事？打死都唔信!大當家出訪回來，又係貼錢買時間，買朋友，不值一提。美國佬呢轉抽曬水，息口話加唔加。之前人民幣扮聰明先貶值，點知搞到止唔到瀉，人行迫住出面頂，唯有不斷拋美元；最近再挾多一劑，大陸媒體就吹水話國家隊成功在離岸人民幣市場打爆空倉，講到堅過索羅斯，點知老美一個數據唔Like，終於水落石出，現代版空城計，好一招裝假狗，而家知道俾人當傻仔玩，重要無聲出，雙手奉上美元，外匯儲備再跌落去，人民幣重有邊個信，無人信又點入SDR，老美咪話過支持人民幣加入SDR，不過人家話你符合資格就支持，你唔夠班都無辦法，愛莫能助囉! 阿爺唔該爭氣啦。大眾俾人話排氣唔環保超標，但又唔係政府部門首先驗出，竟然係由一個唔出名工程師在歐洲驗到，諗住美國管得嚴，美版車應該無事，就咁走去同ICCT一齊驗，點知美國D車都唔合格，但奇在2014年5月美國環保署就開始查，一直無新聞，一年後先爆醜聞，跟手寶馬都中招，似唔似早幾年豐田和本田事件，當時日本和中國關係開始修好；而家德國開始同中國行埋D，明撐中國籌組亞投行，咁就到大眾同寶馬踩地雷，都好巧合喎。呢個星期最大突破就係TPP大致敲定，為老美重回亞洲正式踏出重要的一步，不出兩年TPP就同WTO正面交鋒，但在亞洲就有絕對優勢，用美國龐大的貿易市場拉攏亞太區國家，打擊中國的出口，壓抑中國經濟增長，全世界俾老美玩到無曬方向。歐洲就要先睇敘利亞點收科，重有德國點去面對呢次商業信譽危機。港股留意莊家在21000點不斷拋牛仔，小心殺翻轉頭，市場更有人話10月期指結算在21000樓下，信不信由你。 今期主題中廣核美亞1811，中國廣核集團係公司控股股東，亦是受中國國務院直接監管的國有企業，主要業務是電力生產和銷售；加上建造，經營與管理清潔和可再生能源電力項目( 包括核能發電 )，地區分佈中國和韓國；在國內的發電項目遍佈廣西，湖北，四川，河南，江蘇和上海，為了改善業務據點，公司在2015年6月訂立框架協議，打算以約40億元人民幣向控股股東中國廣核集團收購19間於浙江，甘肅，山東，廣東和青海五個地區從事開發，建設和經營清潔能源發電公司 ( 包括風力發電和太陽能發電項目 )。由於國家支持清潔能源的長遠發展已經係必然趨勢，亦係順應國際潮流；加上落實國企改革的政策和母公司的壟斷性優勢，不排除母公司日後會不斷注入優質資產，行業前景一片光明。唯一擔心是自從日本海嘯後，國內群眾對核電相關設施的安全考慮和選址開始產生抗拒，過去一年已經出現多次維權事件，這也是迫使公司希望向控股股東收購項目的原因。撇開不利因素，公司中期業績賺錢唔派息，有D孤寒，按現價1.9計，建議在1.65附近買進，短線目標價2.1，中線睇2.5。 下星期講隻信星集團1170

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 數據差，信心更差 一個月餅700點，呢個中秋都算難忘。全世界又俾中國D數據搞掂，香港咁近就唔好講，係咁意就落700點，美國，歐洲齊齊跳水，真係一啖沙糖一啖屎，呢頭諗住唔加息住可以升翻少少，轉個頭就中國數據唔靚，個市謝曬。香港就維持原判，恒指穿穿20000點就放心買。祖家個市就無謂提，大當家出遠門，又係洗錢買朋友，人民幣已經唔貶唔得，重要為左應酬老美同IMF去死頂唔俾落，外匯儲備消耗到差不多，容乜易人狙擊匯率，細路仔都識，專家會唔識？只好嘆一句中國無人材。 美國就行緊個大圓頂咁款，好多人話見頂要回，我就覺得正常唔會，因為大選就到，一定有人維持秩序，睇佢次次16000點就彈，心照啦!加上今年肯定加息，唔加息又點證明救市成功，經濟好，美元轉強，剛好配合美國公司走出去做併購；歐洲都係無特別，等美國加息先出大方向。 今期主題輝山乳業6863，新鮮熱辣出單新聞，河北藥監局驗出輝山的高鈣奶含有毒硫氰酸鈉超標；公司即時開記招回應，質疑檢測程式違規，檢測結果不實等等。從媒體知道，檢測出問題的是河北藥監局，但佐證輝山出品無問題的是遼寧省食藥監和另外三家協力廠商檢測機構，大家有無覺得奇怪，主事單位在發現有問題樣本後，進行了應急抽檢，針對輝山瀋陽總共7個批次的產品(無話包唔包之前出現問題樣本的批次)，結果都合乎監管要求；河北藥監局走去查瀋陽輝山，好似唔係好合理；如果發現問題的產品在河北，應該查河北先係，如果產品不在河北，咁當初點會俾河北藥監局發現；重有就係媒體報導直指河北藥監局有違規或者失當，在9月30日河北藥監局撤銷對輝山食品銷售安全警示，官腔解釋撤銷原因，但無搵出之前超標樣本受乜影響而引起，人為定意外，無從稽考，中國食品安全又一次響起警號。公司現在市值約380億，盈利約10億，睇翻末期業績營業額升11%，稅後股東應佔溢利跌約30%，落差好大，證明經營成本增加，市場經營環境困難；但公司和大股東分別先後有回購，盤生意咁唔好做都肯回購，好D諗就係有大刁跟尾，但係傾緊刁就明目張膽市場買貨，當個買家傻仔？加上派息率得25%，留咁多現金在手又唔似想私有化。往唔好處諗，大陸老闆最鐘意押股票借錢，唔通借左錢股價唔跌得？最後一個理由，有貨買要用錢所以派息少D，但係唔多似；反而我覺得借殼俾伊利機會大D。總結輝山乳業係一隻經營溢利走下波，市場暫無突破位，消費者對國內食品安全信心不足，加上派息率又低，高市盈率，個人認為不值得持有，合理價在1.75附近。 下星期講隻中廣核美亞1811

山窮水盡無錢買，前路茫茫再穿底 香港個市升無份，跌有份，弱過藥煲。睇期權走勢，大盤無乜好寫，三個字，重要跌，有貨等溝貨，無貨等執平貨，但遠期港匯合約又有人賭脫鉤，希望唔會發惡夢。呢兩日港匯轉強，唔使問都知錢從那裡來。反而阿爺個市就難估，忽然玩放寬住房公積金買房，兩成首期就可以做業主，真係唔怕散戶埋單唔炒股去買樓咩？星期二個市重絕，上證跌40點唔夠，但有差不多1100隻股跌停，要跌5%以上隨街都係，好似托住派貨喎，邊個話鬼佬先識粉飾櫥窗。真係要解釋只有兩個可能，之前提過大股東質押股份開始斬倉是其一( 內地媒體報導，813間公司穿左押股票時個市價，其中158間穿左50%，有D唔好彩要穿70% )；其二係有大戶資金先逃離股市；如果話係散戶拋，好似無理由而家先止蝕喎!散戶一直等緊養老金同央媽資金入市，假設( 只係假設 )新一輪斬倉潮出現，大量沽盤在市場拋售，真係跌幾日都未跌完，邊個會出手接貨，大戶怕輸，散戶又無錢，呢個時候阿爺出手，價錢要幾低有幾低，做埋大股東，再揀一D有潛力公司順手私有化，贏面又贏錢，真係犀利過美國隊長。星期一人仔又開始升翻D，真係同專家講既一樣，貶值範圍可控？咪唔記得大當家9月訪美，老美成日話人仔太低，大當家出發前擺明送禮。人仔之前突然貶值，聯儲局倒瀉籮蟹，從陰謀論去睇，上次環球市場因人仔貶值大跌，美國即時話9月未必加息，最近阿爺稍稍企穩，又話加息唔使等通脹到2%，分明睇住阿爺玩。瑞郎8月中開始升，回調又跌唔穿之前個底，負利率都咁多人捧場，個市搞乜鬼？老美未加息就先用指數影響全世界，從QE到加息都係佢一馬當先，財技玩到出神入化，不知何年何月亞洲先有呢個水準。歐美市場都係靜觀其變比較適合。 講翻SOHO中國410，公司業務從三年前開始轉型，不再以銷售為主，主打出租市場，重點在北京和上海中心區建設和持有高級商業地產，同時以併購型式擴大版圖。目前公司手上擁有12個項目( 包括在建項目)；截至去年底已建成物業總建築面積約84萬平方米。佔總開發項目近一半面積，餘下一半預計將在2019年前全部完工。到時候公司將持有北京和上海城市核心地段物業約180萬平米( 寫字樓為主 )。北京和上海兩地高級寫字樓的租金和去年相比有升有跌，還好只是窄幅上落，另外預期供應量的增加，難怪潘主席在中期業績用了持謹慎態度來形容未來幾年的寫字樓出租前景。加上某些項目面對高空置率或者租金收入下降，可想而知經營環境並不樂觀。再翻查業績，融資成本成為公司死穴，貸款利息約佔租金收入的70%；如果扣除物業重估市值入賬，成績表有機會見紅。參考香港幾間上市公司近期不斷拋售國內物業的行動，個人對內地房地產前景看法負面，剛好大市又出現一浪比一浪低的格局，有貨沽貨，走為上著。 下星期講隻海昌海洋公園2255