Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. QE，散戶等著你回來 歐洲呢個星期四就開會， 大家都期望落劑重藥谷一谷，但係歐元開會前見底企穩，點都唔似會開大個水喉放水，無理由無人收到風沽定歐元先。德國IFO商業景氣指數同商業預期指數都差於預期，加上多項數據近幾個月都走低，某程度上支持歐央行進一步量寬。睇下面個圖就會發現連債價都只係升少少，更唔似大手筆放水，預期失落又唔知要跌多少。   老美GDP增長穩定，重可以算係好過預期；剛公佈非農又超靚仔加上失業率長期處於偏低水平，乜有利加息條件都出晒，前費城聯儲主席重話應該加0.5%，真係想人死咁款。但係諗深一層，耶阿姨無理由加完息話咁快就放軟手腳，咁即係自己打自己兩巴，重記唔記得之前佢話過老美身為負責任大國，加唔加息除左睇自己經濟表現，重會照顧其他國家感受。咁就出事，呢個星期新興市場就全面反彈，即係話頂得住加息；商品價格又大幅抽上去，容乜易通漲出現，睇落要耶阿姨唔加息好似真係無理由。香港就升升跌跌，但恆指期權19000 short put平左倉，應該無乜大升機會，因為重有大手2000 short call未走；反而國指要小心，期權7000short call點都唔走，重要開埋8400 long put，應該點都要再跌一輪。阿爺出口數據跌兩成，創七年最大跌幅(七年前咪09年頭，金融海嘯剛剛爆呔)；出口急跌主要由於人仔升值，實體經濟又欠支撐，睇下個個都去炒樓，搞到樓價就升到無人信，生意反而無人做；樓價貴左買唔起都唔怕，有人借埋首期俾你，一條龍式服務反影樓價已經脫離現實，只能成為好似股票咁樣的金融工具，睇下邊個接火棒中招。 呢期隻主角安全貨倉237， 集團主要經營貨倉同地產投資，之前賣得成柴灣貨倉後(折合股東應佔權益每股約13元)手上大把cash，而家得翻觀塘振萬廣場(連101個車位)同國瑞路安全貨倉，估計呢兩件貨大約值33億(折合股東應佔權益每股約25元)，扣除相關物業減值，兩邊加埋每股點都值30元。加上集團近幾年開支又唔大，無特別錢要用，差唔多每年經營溢利都派曬俾股東，所以一公佈賣左柴灣貨倉股價就彈升兩成幾，各方友好都估計會派特別股息，唔係點都唔會咁癲。睇翻2010年當時保留過一筆資金打算重建國瑞路安全貨倉，點知城規會唔批，集團2011年尾就將筆錢當特別股息派翻俾股東，証明集團唔喜歡留太多cash在手，偏向派息，股息年年有兼夾高，吸引一班好息之徒捧場，單股價呢幾年就升成10倍，真正財息兼收。大股東一月中重夠膽每股作價18.62場外增持300萬股(大老闆都唔覺貴，肯定有後著)。由於創辦人舊年仙逝，家族成員好大可能賣貨倉派高息分家產，呢種動作唔新鮮，近年就有創興銀行做例。如果無估錯，四月中會開始越升越有，到六月派全年成績表時公佈派特別股息。預計目標價24元。 下星期講隻永嘉集團3322

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 東風吹，戰鼓擂 阿爺放完假派利是，唔理你假期外圍跌到反肚，開市兩日都力頂(起碼第一日裂口低開都撐翻上去，對得散戶住啦)，完全無補跌，阿爺要親自出面維持秩序(假期不斷出利好消息)，散戶醒目就先散水，走遲左可能無機會。1月外儲又跌成千億，雖然比預期少，但係大數得3萬幾億，咁少落去用乜易乾塘(唔係話貿易順差咩，點解重會少咁多)。央媽發文件容許符合條件 (年收入不低於50萬，名下金融資產不低於300萬) 的個人參與銀行間市場債券交易，進一步發展債券市場(個格似銀行甩唔到手搵散仔接貨多D，直情係簡陋版雷曼)，銀行搵唔到客借錢都唔玩，好極有限。1月個市好成點有眼睇，新增貸款竟然大增，好多名嘴都話唔知點解，計我話呢條數唔放出街，過完年有幾多公司開門真係唔知(國內已有傳聞有公司被勸告不能倒，無錢出糧可以先拖住的講法)，加上中國人要面，做得老闆點會想年尾執笠，過年重點見人；重有係企業預計好快人仔撐唔住，拿拿聲借人仔還左美金先；最怕表外貸款而家浮面，因為企業貸款增加二萬億，企業貸款八千億都多唔到，錢去左邊就自己估。香港就彈下回下，上週五期權19000呢個禮拜就到左，其他為無乜動靜，不個啤啤熊19500俾莊家掉到隨街都有，小心殺埋熊仔先落。瑞典央行下調利率，多間歐洲銀行股價跌破近年低位，當中包括意大利同希臘D銀行。沙特同阿聯酋又話要派地面部隊去敘利亞，D油咁都彈唔起真係前途似咁；幾大巨頭坐低傾減產又唔成事，睇怕老美好快有能源公司頂唔住，大盤跳水又大把平貨執。 呢期輪到隻和美醫療1509，目前中國最大婦產科私家醫院，旗下11間醫院分佈7個城市，當中北京同深圳醫院收費最高，生仔套餐5至6萬人仔，坐月就盛惠5萬8(又真係幾貴)；整體員工數目接近1400人。估計15年全年業績放緩，原因係國內人不喜歡羊年生B，16年業績應該會有明顯增長；二胎政策落實執行，很大程度上會助推業績，加上現時病床使用率只有不到60%同年底會有新醫院投入服務，業務增長唔會造成人手同配套上壓力。集團亦計劃年中全面加價5至10%，預期可以改善20%盈利表現。要考慮係集團客戶以中產階層為主，二胎政策能起多少催化作用言之過尚早(有錢早就生左，未生就政策放開都不一定生)；由於人口政策的影響，預計每年出生人數只會有序下降，唯一可能出現爆發期只有明年，之後日子就要同其他公立醫院，私立醫院爭客，口結果亦係估唔到。舊年7.55 IPO後最高見過8.4，之後就潛水，可以趁大市回調時在5.8附近買入，目標價7元。 下星期講隻必瘦站1830

Sorry, this entry is only available in 中文. For the sake of viewer convenience, the content is shown below in the alternative language. You may click the link to switch the active language. 熊市還未完結，散戶仍需忍耐 呢個猴年好熱鬧，重未開始金同志就除夕放衛星，搞到日韓呱呱叫；阿爺出奇大反應，又譴責又交涉(呢次燒到埋身唔出聲都唔得)，但表態唔想經濟制裁朝鮮(話怕有難民潮湧入中國，咁都得？)週一只要有盤開D市場都腳軟，都未話有乜進一步行動就反晒肚，好似跌過左籠；話口未完南韓向朝鮮隻船開火驅趕，個市要反彈真係想都唔好想。上星期提過金價可能短期見底反彈，果然在金同志除夕表演影響下應聲彈起(唔通又有人事先知道)。而家最尷尬就係韓日只要一裝老美套防禦系統，就隨時有可能擦槍走火，唔裝又怕唔安全，萬一出事散戶又要捱沽(家陣都搵錢至上，打仗肯定唔會)。美國最近數據靚仔，除左非農數據出乎意料差左，其他數據都支持三月加息，但會後聲明同非農都傾向鴿派，唔支持短期加息；睇大盤就好似頂唔住，加息後無段好睇，越落越有，關鍵在美匯指數破唔到頂，100都企唔穩，升值預期唔夠，D錢又點會急住去買貨，但小心係老美個局，等美匯空倉夠多，一劑挾爆淡倉，用補倉盤推高美匯，引發資金回流扯高股市(呢兩日外匯市場美元匯價好似沽唔落)。特朗普在黨內初選剛下一城，如果最終俾佢坐正，阿爺明年呢個對手都好難搞。德國財長話德國可以在15-16年度會完全消滅赤字，默師奶掌政10年功不可沒，雖然難民問題引起國民不滿，但德國無默師奶就無今日，相信國民重會想佢連任，繼續呢種好日子。歐洲銀行股價屢試新低，德意志銀行創金融海嘯後新低，瑞士信貸銀行跌落24年新低，投資歐洲市場睇怕都係遠離金融類股票好D，由於整體經濟復甦(起碼最壞時間已過)，零售和服務類股份可以優先考慮。香港年初一就出大事，但好奇怪，國內媒體對呢件事報導得好低調(唔通怕影響過年氣氛？)。上星期先話左期權個位做得好低，點諗都諗唔到會咁淡，點知內憂外患(朝鮮加上旺角事件)一齊到，大家扣好安全帶坐翻轉過山車，18300守唔住就17200見，國指關鍵位7300。阿爺過年放假無突特別。 呢期輪到隻嘉里建設683，集團擁有三大業務版塊，包括物業銷售，出租同物流(已分拆嘉里物流636上市)。關於物流業務對集團利潤的貢獻可以忽略，因為波羅的海指數一直低完在低，幾時蝕本幾時穩定都唔知；租金收入將會係集團賣點之一，對比SOHO中國優勝地方在於擁有酒店業務，但大部份都在國內，同樣要面對經濟下行，人民幣貶值的不利因素。最近財報顯示租金收入有低雙位數增長；物業銷售方面錄得倒退，金額同毛利都高雙位數下跌；加上集團每年淨利息支出接近10億，派息率唔高同時國內經濟開始加速下行，集團更要面對相當高匯兌風險，包括美元轉強後造成美元和港元的債務利息支出增加，主營業務收入的減少，重有房地產市場下跌預期，雖然現時每股資產值約56港元，綜合各個不利條件後，每股合理值應該在20左右，在14元附近可以考慮買入。 下星期講隻和美醫療1509

不戰而屈人之兵 呢個星期最多精彩新聞緊係索老爺同阿爺口水大戰。被譽為索老最後一仗，很多人都不希望索老贏，但個人希望看到索老打漂亮一仗。索老揚言做空亞洲貨幣，阿爺第一時間話做空人民幣必定失敗(好似人地無話沽人仔喎!可惜官方出完口術人仔同股仔都腳軟)，到底係此地無銀定強棒出擊，好快有結果。黑田行長睇落就損人不利己，竟然建議阿爺實施外管，咁就唔怕資金流出，匯率唔使頂又保住外儲實力(日本紙一直想貶值幫出口，阿爺外管後熱錢實湧去日本，損人兼害己，唔通係索老做空左日元？)。實施外管首先會影響入籃，其次係外界對人仔信心崩潰；雖然效果立竿見影，有效穩住資金流失同保住外儲，阿爺要面，唔會用呢招，用行政手段收緊結匯就有可能，其中官方對NRA(非居民帳戶)的態度明顯改變可能就係開始(之前踢爆地下錢莊用NRA送錢出國)。另一點係深圳好多銀行都收緊地產中介買樓貸款，深圳去年樓價平均升幅5成，唔通銀行都聞到味？據統計數據，一年內到期企業外債約1萬億美元，債券和利率市場化加上外匯掉期直接成為空軍籌碼；假設成個流程係咁，商品價格急跌，糧食危機做成輸入性通脹，拋空債券同貨幣，利息抽高，斷供潮出現，房價跳水，銀行壞賬急升，最後自然不攻自破。老美呢次唔加息，會後聲明亦無話會放慢加息速度市場，將之前班評論員估三月都唔加息，可能今年只象徵式加１到２次D預期落空；之前耶阿姨話今年加息4次，以佢穩健作風斷唔會亂吹，數據在佢手，又要證明利率政策正確，加息無可厚非，要記住美聯儲唔會理其他國家死活(當初QE就係)，只對自己政府負責。委內瑞拉成為老美加息效應下新一名犧牲者，今年將有100億外債到期，違約已成必然事實，之前傳過賣島俾阿爺填數(500億美元)，但雙方照樣否認，咁樣阿爺條數咪凍過水，睇落唯有錢債石油償。歐洲基本平穩，只差難民問題點收科。香港就平穩等反彈，始終覺得今年低位未出，反正小心農曆年期間亞洲匯市城門失火，香港被殃及池魚。聯匯不破，唔係香港底有幾厚，係聯匯可以幫阿爺鎖定空間同風險吸收美匯。 呢個星期隻康寧醫院2120有D特別，集團96年開始從溫州起家，主打精神專科連鎖醫院，地區包括北京，深圳，成都，杭州等多個地方，當中自營和管理的醫院數目差不多，無明顯偏重任何一項業務。最近3年集團雖然將床位總數從1090增加至2210張，使用率仍然維持在95%，真係生意唔憂做。按14年業績計數，集團在整個精神科醫療市場市佔率只有1%，按收入計就排第2，淨計私家精神病院就有5.8%，目前重係國內私家精神病院最大僱主。國內比較出名的精神科醫院都係公立醫院，床位供不應求，政策上更傾向支持私家醫院行業發展同允許私家醫院收取較高收費。統計數據顯示，未來幾年國內私家精神科醫療市場將以接近每年22%增長。要留意係私家醫院無論在認可度，人手同醫保報銷方面都明顯比公立醫院弱。現價40元附近，一年目標價55元。 下星期講隻銀泰商業1833

項莊募劍，意在沛公 新年測市，仍然覺得會港股因新興市場走資潮先落一轉，然後再受惠國內熱錢流出，聯匯同低估值吸引資金流入，但中資股分分鐘贏粒糖輸間廠。講下大圍，近年大家將焦點放在祖國，先睇一堆唔靚仔數據，最近五個季度祖國資本外流約5200億，籠統概念係剛好抵消左2011年開始流入的全部外資(單去年第二季就撤走1420億)；舊年上半年貿易盈餘2600億的同時出現外匯儲備下降(奇怪!)，更難明係阿爺手上美債創14年5月以來最高(官方數字約1.3萬億)，原因係祖家通過歐洲結算中心減持美債，賬面數就瞞天過海。除夕前央行注資國開行480億同進出口銀行450億，更加驗證外儲緊張呢個猜想。從彭博數據顯示，資金正高速離開中國而且量越來越大，速度亦越來越快；加上新的外匯現鈔管理條文將在2月1日開始實施(機構兌外匯現鈔已在上星期收緊)，今年人仔匯率大波動同外管越收越緊已成定局，保守估計兌美元兩年內有機會重上8算。匯金公司公佈將手頭D貨轉左俾全資子公司(匯金資管)，意味退市行動已經各就各位，隨時一觸即發。大話怕計數，1月份阿爺解禁規模7000億(可能唔止)，再加其他因素，A股今年無運行，2600點咪話無可能。伊朗呢頭話對外唔用美金結算，阿拉伯迫於無奈黐翻老美趕伊朗大使走，北極熊唔表態就點都要搵翻個水泡頂住。預期歐洲在老美第二次加息後開始見底，因為歐元未貶夠又唔確定老美加息步伐快唔快，個市唔會放膽升。除夕前另一驚喜，美聯儲從市場逆回購5000億(唔通阿爺撐人仔沽D美金去晒老美度？)，加完息無耐又抽水，老美明顯想進一步抽升市場利率，咁樣好快就再有一隻貨幣爆呔，確保資金流入美元資產預期。 輪到今期主角奧思集團1161，集團主要業務分別係銷售美容產品同經營美容院(包括美容院，SPA，醫學美容中心)；業務覆蓋中國，香港，澳門，新加坡同台灣。先從殼股方向睇，業務單一簡單，容易重組同注入新業務；公司市值5億唔夠，而家隨便一個主板殼都最少6億(重要係可遇不可求)；派息率接近100%，證明無資金壓力(買左唔怕要供乜供物)，但亦顯示管理層無打算有動作，實行唔做唔錯；長期細成交一般都係貨源歸邊(無成交搵邊個炒，無散戶坐貨係好事)。如果從股票本身出發，業績一般但維持(成本控制有改善)，多少同管理層保守作風有關；業務地區分散，某程度上分攤左人民幣匯兌風險對業績影響；美容行業向來都同其他消費行業不同，較少受週期(季節，款式，產品等)影響；國內高端美容行業開始進入高增長期，公司從現有基礎去開拓業務難度唔大，加上國內消費模式同香港唔同，公司的美容相關項目預收款有3億多，對業績起到一定的支持作用。從殼股去評估目標價大約係0.9左右，單從個股本身，目標價0.75；按現在股價0.6可以先嘗試買入，最理想買入價在0.5附近。 下星期講隻百麗國際1880

乾坤大挪移，反轉再反轉 恒指週一回調，大家都話阿爺累街坊；有玩期貨就發現上星期五期權新開倉位在21800，只要守到自然22800大家見，若果受唔住就再見21000，技術上造個雙底(好似)；但係我可以講，守唔住就20400甚至更低。點知曇花一現218XX就調頭，表面睇應該唔在跌，但要小心，人地成手權唔平倉等輸錢，無理由呀!奉勸各位，小心D好。老美玩油價比我估中，真係辣著左油皇，沙特話唔減產，皇子話大把水，大家累鬥累，你壓油價咩，我就係都唔減產，睇你老美d頁岩氣公司點做生意，等住執笠，呢舖好睇過大戲，唔知邊個認衰仔先，不過玩財技同經濟，我點都信老美多D。大家注意一點，皇子投資遍天下，隨時班資回朝，咁新興市場就大災難，但仍然維持先前預測，港股受惠聯匯同加息。老美加息無耐就先後搞低左阿根廷同阿塞拜疆，個個話下個唔係俄羅斯就係巴西，我話輪到哈薩克斯坦就真，點解？近年只要邊個國家同祖國行埋少少，老美即時有動作；如果呢次成功做低左小哈，咁之前簽落幾百億訂單，乜鬼一帶一路，亞投行未出頭先捱棍，老美一哥地位又坐穩D。祖國市場1月期指好倉底，小心頂到1月初就散水(結算日第三個星期五)，鬼叫每到年尾都水緊，重有之前救市唔俾持股5%以上D股東沽貨個限期界滿(1月8日)，已經有6間上市公司股東話左一定會沽貨，重有十幾間未出聲明(執輸行遲慘過敗家喎)。阿爺新年大禮再送新產品吸水大海綿一塊，個名好威水咁叫戰略新興版(難聽D講就係新三板，創業板，中小板都唔夠班上D公司)，加上明年開始註冊制，又鼓勵發企業債，收緊P2P(民間最熱愛投資只一)，咁吸水法散戶點都有一瓣中，所謂生意淡薄，不如炒貨。歐洲市場近年尾無乜特別，反正老美加息展開，利率不確定性掃除，基礎因素穩健，值得在2016年重點關注。 今期主角現代牙科3600，集團業務專注生產三大類假牙產品，固定假牙，活動假牙和其他口腔器材(包括矯型器材，護口膠和其他)；客戶包括牙科醫生，診所，醫院，經銷商和其他渠道；在中國擁有21個銷售點，而海外就有29間服務中心。兩個主要生產基地在深圳南山，第三個在北京，另有一個專供法國和印度生產器材的基地在安塔那那利佛。集團在歐洲，美國和澳洲共擁有5個自家品牌，中國和香港則各自有一個品牌；收入來源大部份來自歐洲，澳洲和中國，相信強美元有望在匯率上提升適當盈利。存貨周轉率能造到16天左右的可接受水平，超過50%的毛利率，整體可以講係有憧憬空間；可惜純利率只有約10%和接近70%的負債比率，最慘不忍睹就係中期成績表顯示股東應佔溢利出現20%倒退，初步估算超過30倍PE，現價不宜沾手，投資者可以考慮在3元附近買入，   下星期講隻奧思集團1161

息魔重現，風聲鶴淚 杜指上週五大跌，恒指ADR唔郁，週一開市果然硬淨，大市應該短期見底。恒指從21000點唔使幾日就彈到21800，中間回少少又企翻上去，應該沽壓好快就消化晒，然後就衝22800。從港股近期表現更加證實之前判斷老美加息對港股是利好不是利空的說法；明年多個大行睇淡港股行情，個人初步估計恒指明年高位有望上試24300(深港通開通帶來刺激作用已計算在內)，要再高就真係要時勢做英雄了。老美就大跌震倉，原因各說各話(好多人話老美經濟本來就唔掂，加息實死)，我就覺得最關鍵係議息前太多資金流入美元資產相關衍生品，講難聽D就係老美自己咁辛苦托起個市，點會俾外人輕易賺錢；重有阿根廷貨幣暴跌引起恐慌，大家都以現金為王，反正杜指高位橫行，先減倉無壞；陰謀論出發，這是從側面去打擊中國經濟，阿根廷當天除了宣佈放開外匯管制，還有一條比較少人留意的新聞，就係阿根廷政府將手中等值31億美元人民幣和祖國央行兌翻美元救國(當年同祖國簽訂總額等值110億美元貨幣互換協議)，證明了兩點，中國外匯儲備被動地減少(部分抵消了人仔入SDR支持匯價的利好)，緊急關頭都係美元可靠，如果唔係人地都唔會換翻美元，如果情況再發酵，除左呢31億重有其他跟尾。杜指大跌但17000點期權開重倉，關鍵支持位只要不破， 18000點自然很快到(之前18000倉位一D都無少)。老美同時解開除實施左四十幾年原油出口禁令，擺明唔妥俄羅斯，分分鐘城門失火，殃及池魚，拖埋中東落水。阿爺個市無乜特別，寶萬大戰已經唔係一時三刻能決定勝負，散戶只有隔岸觀火，靜待結果。股指期貨結算後大市成交增多，但大手開好倉欠奉，重有個幾月過年，炒少兩轉疊埋心水放假好過。 今期主題遠東發展35，集團主要從事物業投資，包括酒店，住宅和停車場。按照最近業績報告顯示，截至九月三十日為止，期內收益下跌35%但毛利只跌27%，證明管理層在成本控制方面有下苦功。旗下資產主要係自有物業，以成本減折舊方式入帳不能反映真正價值，造成估值偏低，若進行重估入賬，粗略估計資產總值會超過200億，按發行股數攤分後每股資產淨值約10元(按現時入賬方式 ，每股資產淨值約4.6元)。集團在十月中用較市值有折讓價錢私有帝盛酒店，將集團總資產值增至約235億，相當於攤分後每股淨資產值超過11元。自月初開始集團多次增持股份，證明管理層對公司有信心；假設明年資產大幅減值30%(可能性十分低)，PB回升至0.5左右，股價應該值3.8元，按現價算有約四成空間，可以投機性買入。 下星期講隻現代牙科3600

山窮水盡疑無路，柳暗花明又一村？ 香港星期三升到你唔信，無厘頭重上20000點，你話香港有好消息咩，又好似無(阿爺就有個似是而非的理由)；勉強算係港交所業績創新高，但拆開條數睇就發現單第四季計已經倒退差不多三成半，今年開局環境重差，而家追入想財息兼收就要小心。小心大市仍然會chok死人，國指7000點同恒指18200附近期權淡倉唔肯走，唔通大戶呢轉都要輸錢？預期下個禮拜二應該會見真章。恒指短線阻力位在20080，國指短期阻力位在8440附近。 祖國魚缸越升越有，原因有幾個：兩會，降準，沈陽免首期買樓(雖然好快就澄清話考慮中未實行，但俾市場解讀成政府會用行政手段不惜一切救樓市)，提高Margin額(食砒霜毒老鼠，咁樣加槓桿，容乜易又翻版舊年六月)，其實市場興奮主要因為星期二晚一個傳聞，話說新主席講註冊制不適合中國，短期內不會推出，第二日D散戶就傻左咁買貨，個市就係咁升到癲；咁就解釋左點解水泥，鋼鐵，房地產同券商版塊領跑，好可惜禮拜三晚主席就話無講過，咁朝早買左貨D散戶咪做左羊牯？市場基本上就無曬信心坐貨，個個都短線投機，一個傳聞就可以大升大跌，禮拜三呢個美麗的誤會又唔知可以頂幾耐。官方口講資本外流唔嚴重，但係外管局已經停止發放QDII新額度，即係QDII2都唔知幾時先出世；跨國資產管理公司有QDLP牌，但外管局又唔放額度，咁有同無都無乜分別。穆迪下調中國評級展望到負面，雖然國債評級重維持Aa3，但企業肯定受到連帶影響，發美元債要捱貴息，無法子就只好借人仔，央媽要印銀紙，匯率就好難守得住，睇落空軍有望贏番一仗。敘利亞停火，難民潮應該可以緩和，歐洲情況轉為穩定向好。老美D數據就時好時壞，搞到三月加唔加到息都重估估下，睇落唔會加，但係最近歐洲，美國股市都大幅反彈，連阿爺都抬起頭做人，耶阿姨要加你都吹佢唔漲。杜指近期阻力位將在17100附近。 呢期隻主角鱷魚恤122，公司主要從事成衣銷售同製造，重有物業投資。股齡有番咁上下D股民都會有印象，都唔記得傳過幾多次賣盤都無影的股票(有D似隻米蘭站)。呢次點解會講佢係因為一月尾時候公司發過通告，具體內容就係可能賣盤，不過呢次同以往唔同，潛在買家要先俾3000萬誠意金，如果只係買賣雙方傾唔掂數賣唔成就唔使回水；若果係因為盡職調查有問題或者過唔到交易所先可以回水，睇落買家好似志在必得咁樣，加埋零售同地產市道又唔好，林公子難得有人咁夠誠意開價，早賣早賺。點解會咁吸引，簡單計條數，每股淨資產值1.65，加上主版殼價大約5億，粗略估計每股都值2.30，物業估值打個折頭再加少少溢價，收購價點都值2.0，現價1.50唔到，加上4月5日就有結果，應該實食無黐牙，衰D講人地蝕3000萬買唔成，我地散戶蝕少少都抵啦。 下星期講隻近期創新高的安全貨倉

冰火兩重天，反彈在望 美國議息前席，大眾期待加息前走鬼情況並無出現；一如預期恒指期貨21000，國指就弱到險守9000，好彩更低位置無開新倉，反而之前22800期權無減倉，反彈目標應該在22900附近。由於快到假期，加上復星系只要有少少好消息出就可以借勢挾淡倉，預計大市會急升了事。同樣美股點都跌唔落，杜指重倉位18000點，睇下係唔係加息效應引導熱錢推高美股。老美議息前席歐洲無出現資金流出而大跌情況(之前歐元量寬不及預期引起下跌只係大家嫌歐元貶得唔夠)，證明之前睇法正確(美國加息做成歐元相對貶值，有效幫助歐元區出口帶動經濟增長)。祖國新聞又係一大堆，外匯儲備11月比10月少左3100幾億(M2反而同比升13%)，擺明走資嚴重左，情況再惡化落去就可能大幅增加銀行壞賬比率。另外人民幣匯率指數的推出，明顯針對人民幣與美元那種隱性掛鉤關係(官方一直無講同美元有掛鉤，但事實有目共睹)，現在直接與13種貨幣掛鉤，很有可能出現明升實貶的現象(因為指數升可能只係其他貨幣貶得比人仔更多)，最大可能係想在老美加息後不知不覺中讓人仔快速而大幅度的一貶到位來阻止資金流走，同時又不會讓人覺得匯率波動(一入SDR就走樣)。另一個問題係貨幣貶值對房價的負面影響，先看數據，過去十年投入房地產的資金增速平均在每年20-30%之間，今年直至11月同比增長1.3%(考慮到房價上升因素，實際可能係負增長)；新開工面積出現負增長，待售(空置)面積增加超過16%，連樓花在內的庫存面積差不多39億平方米，去化週期超過4年，終於明白點解要去庫存(熱錢流出加上貨幣貶值，預期房價下跌可能性轉大，庫存更難去)。房價跌，銀行體系容易受衝擊，繼股市泡沫後，房地產泡沫的風險正逐步提高，2016將是關鍵一年。 今期標題永盛新材料3608，公司今年4月和先臨三維（國內新三板掛牌公司，股票號碼830978，市值24億）成立合資公司從事PLA和ABS等各種3D打印材料，整合上下游產業鏈。從研發到生產以至銷售。合資公司註冊資本1000萬，永盛新材料出資600萬。先臨三維專注3D成像技術的研發和相關產品的生產和銷售，但3D列印的耗材需要外購；永盛新材料則主要從事化纖產品的開發，生產和銷售。由於3D耗材和化纖產品在開發方面存在某程度上的相通性。永盛新材料主導3D耗材開發，從而衍生出一個新的產業鏈，而先臨方面就解決耗材供應和產品研發的壓力，在業務架構上做到互補雙贏的局面。另外新開發的3D耗材亦已經投產，主要以PLA為基礎，加入碳纖維形成新的碳纖維增強複合材料；下一步將會研發採用納米技術和加入石墨烯的增強複合材料。永盛市值約5億半，有大量現金在手又股權夠集中，若果石墨烯相關產業受市場熱捧，公司又可以轉型成功的話，第一目標價可達1.80。 下星期講隻遠東發展35

寒天飲雪水，點滴在心頭 恒指繼續尋底，一如所料22400不是支持位，希望大盤在呢篇文見街時能夠在21200點附近徘徊喘定，但我就睇淡好多，可能在20600才是近期支持位；如果大家有印象，幾個月前馬公子減持企鵝，當時我就話個市差不多見頂(原因請查閱之前文章)；上星期馬公子又出手，加上江湖傳聞有投行開盤企鵝accumulator，唔識睇市都要信投行唔做蝕本生意呢條金科玉律，咁個市肯定無運行。國指期權剛9600貼價做倉，破位落就9200先會搵到支持。祖國剛公佈外匯儲備下跌872億比預期多，估計最大原因係官方在市場拋售美元支撐人民幣匯價(唔係點入SDR)，入完籃就有目共睹，人民幣匯價創近三個月新低；假設下月公佈數據回升，大家心照不宣。出口連續5個月出現負增長，大跌眼鏡低於預期，實體經濟弱過藥煲，咁樣房地產去庫存又搵邊個接貨。歐洲市場由於加大量寬預期落空，歐股因為無新水即時大落，相反歐元就因為唔印銀紙彈左上去。油價一浪低過一浪，明顯重創產油國家，油皇水多，大不了從外國撤部份資金班師回朝(可能又有一輪新興市場走資潮)，但俄羅斯經濟就雪上加霜，越窮越見鬼，為左刺激油價(經濟)，唔排除同土耳其講手。地緣風險升溫，最後都係益左美元資產。老美就等耶倫阿姨正式宣佈加息，雖然之前都算吹左風，但市場點都想知道加幾多。如果會後聲明態度積極(確實明年隨後加息時間表)，恐怕美股會先回調17300再上試頂位；假若係見步行步(加完唔知幾時再加第二次)，美股恐怕回都唔回就級級上，杜指隨時明年第二季創歷史新高。 今期點題合生元1112，講股之前先講講國內民眾對公司印象，國內企業海外貼牌生產，老闆化工行業出身，唔專業又扮鬼佬(好似幾負面)；加上網傳公司內部鬥爭，有員工更爆料話銷售數據做假，質量有問題和給醫院回扣等等，雖然未經證實但權力鬥爭明顯，萬一隨便一件俾人證實必然股價跳水。至於股票本質，國家政策的開放，陸續增加的自貿區數目造成平衡進口貨物競爭，直接打擊核心業務；自三鹿事件後，國人始終恢復不了對國內奶粉品牌的信心，對品牌產生負面效應；公司經營策略轉向家庭營養品市場，意圖走雅培路線，但品牌定位和班底實力存在疑問。雖然之前的海外併購能對研發和市場定位有幫助，可惜偏高的作價和集團的高負債讓我對公司的前途有所保留。據之前媒體報導，為了提升消費，實現內需帶動經濟，政府一直在考慮收緊海外代購，甚至可能有政策出台採取某程度的打壓。不太喜歡派息加上今年業績預計大倒退，還有未來兩年集團有一批CB到期，個人並不看好，建議現價拋售，合理價為8.0。 下星期講隻永盛新材料3608